Jinghpaw laika ka ladat Sara tai sharin hpawng (TOT) hte ginhtawng Chyum laika sharin hpawng galaw
Myitkyina Ginwang Hkristan Hpaji Dap hte Laili Laika Komiti ni woi awn galaw ai Jinghpaw laika ka ladat Sara tai sharin hpawng (Teacher Of Training) hte Ginhtawng Chyum laika sharin hpawng hpe Myitkyina mare hkalup hpung (Gies) nawku jawng kaw Febrauary shata 11 ya shani kaw nna February 15 ya shani du hkra, sharin sa wa na re lam na chye lu ai.
“Jinghpaw laika hpe grau nna tang du hkra jawngma ni hpe sharin ya lu na matu, prat masa hta hkan nna Jinghpaw laika ka ladat nnan ni hte sharin ya lu na matu hte Chyum laika, Mahkawn ni Karai Kasang a Mungga hte kashu kasha ni grau nna chye chyang wa lu hkra sharin ya lu na matu yaw shada ai re” nga nna KBC Laili Laika hte Labau Kimiti Hpa-awn Saranum Lar-u Hkaw Tswi tsun ai.
Sharin Sara tai lung la ngut sai sharin Sara/num ni gaw tinang hte seng ang ai buga shagu hta Asuya jawng dat ai ten, ginhtawng jawngma ni hpe Jinghpaw laika Chyum laika ni sharin ya lu na matu re nga nna Saranum matut tsun ai.
Sharin Sara gaw Mungmyit Sinli Kawng Hka Myusha Jawng SJN kaw na trainer Saranum Lahpai Nang Nu Pan hte Saranum Luksing Htang Lwi yan kaw nna sharin ya ai re.
Laili laika hte labau komiti ni woi awn nna, Jinghpaw laika ka ladat Sara tai sharin hpawng hpe February 11 ya kaw nna 13 ya shani du hkra sharin ya ai re lam, Hkristan Hpaji Dap ni woi awn nna, Chyum laika sharin hpawng hpe pang 4 garan nna, February 14 ya hte 15 ya shani sharin sa wa na re lam chye lu ai.
Myitkyina Ginwang kata Rap 6 nga ai hta ndai kalang gaw Myo Rap, Jaw Rap hte Myo Sinna Rap, ndai Rap 3 kaw na sharin Sara tai na Sara/num ni hpe sharin ya ai hta Sara/num ni yawng marai 130 sa du sharin hkamla nga ai rai nna, bai du na bat hta Lidu Rap, Hu Gawng Rap hte Kamaing kaw na Sara/num ni hpe Dumbang E-din kaw sharin sa wa na re lam chye lu ai.
