Daga Buga Hpung hta Karai Mungga Sasana shang ai (75) ning hpring lung seng jubilee akyu hpyi hpawng galaw na
Sama Ginwang, Daga Buga hkalup hpung hta Sasana shang ai (75) hpring lung seng jubilee akyu hpyi hpawng hpe du wa na December shata hta Sha-it Yang Hpyen yen Dabang, Daga Hpung lawk (5) kaw galaw sa wa na matu tau hkyen shajin nga ai lam na chye lu ai.
“Lai wa sai ten hta Karai Kasang a chyeju hpe lam amyu myu hku nna hkamla lu ai hta (50) ning ja jubilee chyeju shakawn hpawng galaw ai marang e hpung masha ni yawng su hprang wa ai, Buga hpung de ai (25) ning galaw ai hta mung hpung masha ni yawng kabu gara shang lawm let grau nna su hprang wa ai re majaw, ndai kalang lung seng jubilee bai galaw ai a marang e grau nna su hprang wa ai hte Karai Kasang hpe grau kam sham wa nna, wunli lu chyeju hpring ai hpung masha ni byin tai wa lu na matu ndai lamang hpe galaw na re” nga nna Sama Ginwang Amu Madu, Daga Buga Hpung Ningbaw Rev. Nbwi Htoi San tsun ai.
Lung seng jubilee ten du ai re majaw hpung masha ni yawng shang lawm let nawku daw jau let akyu hpyi wunli la ai hpawng galaw na rai nna, buga hpung kata na asak 75 ning a lahta na ni hpe shagrau sha-a ai lam, magam gun lai wa sai ni hpe shagrau sha-a ai lam, Sama ginwang buga shagu kaw nga ai buga hpung ni hpe mung jubilee masat kumhpa shadu ai lam galaw na re nga nna Sara matut tsun ai.
Daga buga hpung gaw Sama Ginwang kata kaw na buga hpung langai rai nhtawm, Daga buga ginra gaw laiwa sai 2011 ning hta hpyen majan a majaw, buga shara shagu hta hpyen koi yen mat ai rai nna, ya aten hta buga masha law malawng gaw Sha-it Yang hpyen yen Dabang, Mai Na hpyen ye Dabang, Shing Chyai hpyen yen Dabang ni hta shanu shingbyi nga ai re hpe chye lu ai.
Hpyen majan a majaw tinang mare buga kaw nna hprawng yen ra mat ai Daga Buga hpung masha ni htinggaw 100 jan hpe gaw lu sagawn la sai rai nna, Daga buga hpung hta hpung jahpan nbang ai, nlu sagawn la ai gaw grau law nga ai re.
Daga buga sasana shang ai (75) ning hpring lung seng jubilee akyu hpyi hpawng lamang hpe galaw na matu hkyen shajin nga sai re, Buga ginra nlu mat ai raitim hpyen koi yen nga ai Sha-it Yang hpyen yen Camp kaw galaw na re majaw, Daga Buga ginra hta nga lai wa yu sai myitsu Du Salang ni, Hpung masha ni yawng mung lam amyu myu hku shang lawm nna akyu hpyi ai lam hta mung rau sha jawm shang lawm na hpe myit mada ai lam, shabyin shatai komiti kawn chye lu ai.
