Mawwan Kaji Pat Jasan Hpung ni kaw nna Ka-ni lu sha ai masha marai 44 hte Ka-ni dut garan ya ai masha marai 3 hpe lu rim

Mawwan Kaji grinra Pat Jasan Hpung ni woi awn nhtawm, February shata 15 ya shana maga hkying 3:30pm aten hta Ka Lajawng mare baw Moe Ga Te mare kata kaw Pat Jasan hpung ni bungli shang ai hta Ka-ni lu sha ai masha marai 44 hte Ka-ni dut garan ya ai masha marai 3 hpe lu rim la ai lam na chye lu ai.

Ka-ni lu sha ai marai 44 hpe ningmu jahpaw hkaw tsun sharin shaga ai lam galaw ai, shanhte hpe mara hte maren dung rawt zawn re galaw shangun nna bai dat dat ai, dut garan ai ni hpe gaw ja ja ahkyak la ai lam galaw ai, Ka-ni lu sha nna dut garan ya ai masha Salang Dashi Naw, U Win Moe hte U Su Min Than ni hpe gaw Ka-ni dut garan ai lam hpe hpang de tsep kawp n galaw lu na hte sadi hkam ta masat htu nhtawm, Moe Ga Te sha nrai Mawwan Kaji gai wang kata de tsep kawp nshang na ngu ai shanhte a sadi hkam la ai hta hkan nna, mare kata kaw na shapraw kau ai re. Shanhte sa dut ai mare kata de mung tsep kawp n gayin na matu shanhte a sumla ni hpe shabra da ai lam, shanhte bai shang wa yang Pat Jasan ni hpe shiga bai shana na hku galaw da ai re lam, Mawwan Pat Jasan ni shana wa ai.

Mawwan Kaji Pat Jasan Hpung ni kaw nna bat mi hta kalang Pat Jasan magam bungli hpe galaw nga ai re hpe mung matut chye lu ai.