KIA hte Myen hpyen hpung ni gasat gala majan byin
KIA Dap Ba 3, Dap Dung 12 hpyen hpung ni nga ai shara, Na Lai Gyi maga de, Myen Hpyen Dap, Hk.M.Y 601 dap na hpyen hpung ni htu shadut lung wa ai majaw, February shata 15 ya shani KIA hpyen hpung ni hte gasat gala majan byin ai lam, shawnglam shi sawk ni kawn chye lu ai.
KIA Dap Ba 5, Dap Dung 19 ginra, Num Lang mare hte Daw Hpum Yang mare lapran shara ni hta Myen Hpyen Dap, Hk.L.Y 142 dap hte Hk.M.Y 438 dap na hpyen hpung ni gahti galai shimlam lam hkawm nga ai majaw, lahkawng maga na hpyen hpung ni sadi maja hkat nga ai re.
February shata 12 ya shani hta mung, Mungmyit Sinli Ga (Kachin Sub-state) KIA Dap Ba 6, Dap Dung 36 ginra de lung wa ai Myen hpyen modo 8 hpung ni hpe, KIA Mungshawa Kanawn Mazum (MKM) hpyen hpung ni kawn Nam Tau mare hte Kawnghka mare lapran Mahkaw Kawng kaw bawm hte hkap shingla gasat dat ai lam chye lu ai.
KIA Dap Ba 9, Dap Dung 44 hpyen hpung ni nga ai shara hte kade ntsan ai shara hta mung, Myen Hpyen Dap, Hk.L.Y 11 kata na hpyen hpung ni shamu shamawt du nga ai lam, ginra shi sawk ni kawn chye lu ai re.
