4th lang na la ninghkrin sharin hpawng galaw na
Waimaw Ginwang La Magam dap kaw nna woi awn nhtawm, (4) lang na la ninghkrin sharin hpawng hpe Hka Kum Buga kaw February shata 18 ya shani kaw nna 22 ya shani du hkra galaw na re lam chye lu ai.
“Ginwang kata na kawa la ni KBC a makam kasi 5 hte maren rawt jat kalu kaba wa lu na matu, KBC a magam amu langai rai nga ai makam kasi 5 hku nna sa wa ai hta Karai a hkrung ai Mungga sharin hkam la lu na matu hte Kawa la ni yawng kahkyin gumdin nna, makam masham lam sut masa lam hte lam magup hku nna galu kaba sa wa lu na matu yaw shada let sharin hpawng hpe galaw ai re” nga nna Ginwang La Magam Dap Hpa-awn Usa, La magam dap Komiti Malawm Rev. Labya La Wawm tsun ai.
Ginsup ai lam hta gaw hkung ran lak mat lu ai Dinghku la ni sha shang lawm ginsup mai ai re, grau nna Hkristan nawku hpung rai nga ai re majaw Hkristan dinghku ajet byin tai sa wa lu na matu yaw shada let ndai magam bungli amu ni hpe galaw wa ai re nga nna Sara matut tsun ai.
Sharin hpawng hta Saranum Dr. Layang Seng Ja kaw nna La ni a ntsa Num ni mu ai ningmu hte Wunpawng num ni ra sharawng ai la ngu ai ga baw hte sharin ya na rai nna, Saranum Jum Tawm Nu kaw nna Karai Kasang sharawng awng nna anhte ni myit mada ai dinghku kawa la ni a tsap shara ngu ai ga baw hte sharin ya na re, Sara Shwe Pa kaw nna Chyurum Wunpawng Amyusha ni hte Hpaji shawng lam ngu ai ga baw hte sharin ya na re hte Shana lak jet hku nna Sut hte seng ai ningmu jahpaw ai lam hpe Sara Chyawzang Hkawng Lum kaw nna sharin ya na re lam chye lu ai.
Laksan lamang hku nna Ta Din, Ka Din, Gaw Din ginsup ai lamang ni, Mai kaja ai hte nhkru nhkra ai hpe dang kau u ngu ai ga baw hte Kawa la ni a ka hkrang shingjawng ai lamang hte Gawng magam shingjawng ai lamang ni galaw na re lam chye lu ai.
Sharin hpawng hpe 4 ning hta kalang galaw ai rai nna, 1 lang na hpe Hpung Mai Yang buga Jubilee mare kaw galaw ai rai nna, 2 lang na hpe gaw Bumwa buga kaw galaw ai re, 3 lang na hpe gaw Nawng Hkring Buga kaw galaw lai wa sai lam, 4 lang ngu na sharin hpawng hpe gaw Hka Kum buga kaw galaw na re hte sharin hpawng hta Waimaw ginwang kata buga 42 kaw na Kawa la ni sa du sharin hkamla na re lam chye lu ai.
