Laiza Muklum kata hta hkamja lam hte seng nna lawk shagu jep chyoi ai lam galaw

Laksan Laiza Muklum Uphkang Rung ni kawn woi awn nhtawm, February shata 20 ya shani kaw nna Woi Chyai Hpyen Yen Dabang hte Laiza Muklum kata hta hkamja lam hte seng nna lawk shagu kaw jep joi hkawm ai lam chye lu ai.

“Ya aten Miwa Gumsan Mungdan Wuhan mare hta byin hkrum nga ai Corona Virus shing nrai Covid-19 ngu ai ana gaw, anhte a hting bu mungdan kata hta mung byin hkrum hkra nga sai re majaw, anhte a ginra kata hta mung ndu npru na matu, anhte a ginra kata de na mungchying mungshawa ni shimlum lam lu na matu jep joi ya ai lam re” nga nna Laksan Laiza Muklum Ningtau Uphkang Du, Salang Kaba Myitung Chyang Bawm tsun ai.

Muklum kata hta nga ai Makan Dap shagu na lit nga ai hpa-awn ni the Mungdan Hkamja Dap Ginjaw Rung ni ta gindun nna, hkrit tsang ra dik ai Corona Virus ana anhte a ginra hta ndu npru na matu makawp maga ai hku nna masha hkum ding dek hpe jep joi ya ai lam re nga nna Salang Kaba matut tsun ai.

Madung jep joi ai gaw hkum kahtet shadang hpe jep ai rai nna, hkum kahtet shadang dawn jan lak lai ai masha ni hpe gaw, laksan record la nna Mungdan Hkamja Dap hte hkridun nhtawm, gara hku makawp maga sa wa na ngu hpe ladat shaw nna galaw sa wa na masing nga ai lam chye lu ai.

Corona Virus kumla dandawng ai lam nga wa yang Miwa Gumsan Mungdan Maigan Kyithkai hku matut mahkai nna, Wuhan Virus ana hpe jawm makawp maga tsi gawn lajang na matu lahkawng maga myit hkrum da ai re hpe chye lu ai.

Laiza Muklum kata de February shata 12 ya shani kaw nna Miwa mung de na bungli sa galaw ai malet nhprang ni hte hpaga yungga sa galaw ai masha ni hpe jashawn ai lam galaw nga sai re majaw, ndai malet nhprang manam ni hpe mung jep joi ai lam galaw nga ai re.

Corona virus ana hpe tauhkrau makawp maga lu na matu, Wunpawng Mungdan Shanglawt Asuya Mungdan Hkamja Hap kaw nna mung hkamja lam hte seng nna hpaji jaw ndau shana ai lam, mare lawk ni, IDP camp shara ni hte hpaji jawng ni hta n gup magap ni hpe garan jaw ai lam chye lu ai.