Panghkak Jau Ginwang 100 ning hpring Jubilee poi galaw na matu hkyen shajin nga
Manmaw Saradaw Ginwang kata, Panghkak Jau Ginwang 100 ning hpring Jubilee poi hpe du wa na April 15 hte 16 ya shani hta Panghkak mare kaw galaw na matu hkyen shajin nga ai re lam chye lu ai.
“Panghkak Jau Ginwang kaw Sasana majen je ai ni shawng nnan du wa ai 1920 ning hta Kahtawlik makam masham hpe hkap la ai hta, daining 2020 ning hta gaw 100 ning hpring sai re majaw, Karai Kasang hpe chyeju dum shakawn ai re, ndai buga ginra hta grau nna ngwi pyaw simsa wa na hpe myit mada ai, Hpyen yen hkrum nga ai ni buga mare de angwi apyaw bai du wa sai ni shimlum ai hte matut nna nga lu na matu hte Jinghpaw Mung ting ngwi pyaw simsa wa lu na matu yaw shada ai re” nga nna Panghkak Ginwang Up Jau, Wa Jau Paul Lahpai Awng Dang tsun ai.
Lak lai lam gaw Panghkak Jau Ginwang kaw Chyoi pra ai Nu Maria sumla shadun da ai shara kaw mi moi nat jahtung matse labye ni grai laja lai wa ai shara kaw Jau Korolut kawn akyu hpyi nhtawm, Nu Maria sumla shadun da ai rai nna, Nu Maria a garum shing tau ya ai marang e simsa lam lu la na hpe kam hpa myit mada ai lam, Nu Maria hpe garum hpyi ai lam hte shagrau sha-a ai lam re lam, Wa Jau matut tsun ai.
April shata 15 ya shani gaw Jubilee poi kaba galaw na re hte April shata 16 ya shani gaw Jau tai Dakkasu jawng ngut nna Digen aya Jau tai na matu, Degen aya jaw ya ai poi lamang hpe galaw na re lam, Sara Kaba Sumlut Naw hpe hpung magam gun ai 50 ning hpring masat shagrau ai lam galawna re hte masat dingsat shara ni hpe shaman shagrin ai lamang ni lawm na re hpe chye lu ai.
Panghkak Jau Ginwang gaw hpyen majan a majaw, hpyen koi yen kau da ai grinra ni rai nna, buga masha ni atsawm n lu nga shi ai shara re majaw, poi lamang a matu nam ni hkyen jasan ai lam, shara ni masat shagrin ai lam, nawku jawng ni hkyen jasan ai lam hte lam magup hku nna jasan jaseng ai lam ni galaw nga ai re hpe chye lu ai.
Poi lamang hta Laksan hku nna Wa Saradaw Pawlu Zinghtung Gawng, Wa Saradaw Philip Ze Hkawng, Wa Saradaw Francis Daw Tang hte Wa Saradaw Raymond Sumlut Gam hte Myen Mung ting na Cardinal Saradaw Kaba Cardinal Charles ni hpe saw shaga da ai rai nna, Ma Ma ni, Jau ni hte hpung masha ni yawng sa du shang lawm na matu saw shaga ai re lam chye lu ai.
