32 lang na KBC kasa zuphpawng hte 135 lang na KBC EC dawdan komiti zuphpawng galaw
32 lang na KBC kasa zuphpawng kaba hte 135 lang na KBC EC dawdan komiti zuphpawng hpe February shata 19 ya shani kaw nna 28 ya shani du hkra Manmaw, Roborts Sasana wang kaw galaw la lu sai lam chye lu ai.
EC dawdan komiti zuphpawng kaw dawdan la lu ai bungli ni hpe 32 lang na KBC kasa zuphpawng hta bai dawdan shagrin ai lam galaw ai re.
“Zuphpawng hta Buga hpung 4027 kaw na kasa ni yawng marai 400 jan sa du nna, KBC kaw nga ai magam dap 14, Chyum Dakkasu kaba 2 a magam bungli hte seng ai lam ni, hpyen yen hte seng ai lam ni, du na shaning na bat jet gumhpraw jai na hte jai na matu bai da da ai lam ni hte kaga ahkyak ai lam ni hpe dawdan shagrin ai zuphpawng re nga nna, KBC Amu Madu Rev. Hpauyawng Tu Mai tsun ai.
Zuphpawng hta Jinghpaw laika lu la ai 125 ning hpring chyeju shakawn hpawng hpe February shata 26 ya shana daw hkying 2:00pm aten kaw nna hkying 5:00pm aten hta galaw la lu sai rai nna, Jinghpaw laika lu la ai 100 ning hpring chyeju shakawn hpawng hpe gaw Lawu Ga Ginwang, Mandalay Awng Pang Lai kaw galaw lai wa sai re hpe chye lu ai.
KBC a EC dawdan komiti zuphpawng hpe laning mi hta 2 lang galaw ai rai nna, Kasa zuphpawng kaba hpe gaw laning mi hta kalang galaw ai re lam chye lu ai.
