Kachin Shata Hti Laika Sumtang Hti Hpawng galaw

2016 ning December shata praw ( 14-15 ) ya shani hta Kachin Shata hti laika Sumtang hti hpawng hpe Laiza Muklum

na Hparat Panglai Laika Naura ( Research Center ) kaw a-ngwi a-pyaw hte galaw la lu sai lam chye lu ai.

Dai Sumtang hti hpawng hta Du Kaba Sumlut Gun Maw hku nna hpawng hpaw Mungga hte Kachin shata hti laika a yaw shada lam ni hpe tsun sanglang dan nna Shata hti laika sumtang hti hpawng hpe hpaw ya ai lam chye lu ai.

Kachin Shata hti laika a yaw shada lam ni gaw;-

1.  Kachin shata hti laika ngu mying jaw ai gaw, English ni shamying ai Amyu lakung yang lawm ai hpe tsun ai sha re lam, hpang e gaw yawng a myit hkrum ai lam she rai na re lam.

2.  Amyu langai mi a Makam, Lailen, Htunghking, Laili laika ni hpe shawa man hta htawng madun lu na matu.

3.  Lahkawng ning laman e Kachin Shata hti laika hpe lu gyin shalat hkra shakut sa wa na lam.

4.  Laika sharin jawng ni hta sharin lu na matu.

5.  Shaning, Shata, N-htoi ni hpe tinang a ga hte shamying jai lang na lam.

6.  Htunghking a masat masa n-htoi ni masat masa galaw la na lam.

Dai Zuphpawng hta Htunghking Salang marai ( 7 ) kaw nna shanhte gyin shalat da ai Kachin shata hti laika Sumtang ni hpe hti tang sanglang dan nna, Htunghking hte seng ai Salang nkau mi mung sa du shanglawm ai lam chye lu ai.

Shata hti laika Sumtang hti hpawng hpe shata ( 6 ) daram na ai hpang kalang bai galaw na re lam hte Buga hkan na Htunghking Salang ni hpe mung saw shaga na re lam chye lu ai.