Sama Ginwang Music ningbaw ningla shalat sharin hpawng galaw
Sama Ginwang Music Komiti kaw nna woi awn nhtawm, Music Ningbaw Ningla shalat sharin hpawng hpe Mada Buga, Dajang Sut Ra mare kaw February shata 24 ya shani kaw nna March shata praw 5 ya shani du hkra galaw na re lam chye lu ai.
“Sama Ginwang gaw Hpyen koi yen ai shaning tsawmra na mat sai sha-n ga, nawku hpung kata hta Music mahkawn mangwi madum sumpyi hte Karai Kasang hpe shakawn shagrau ai lam hta mung hpang hkrat mat wa sai rai nna, sasana magam bungli hta mung music hte daw jau ai lam hta grai gawng kya mat wa sai re majaw, hpyen yen taw nga ai aten hta raitim masing nga nga hte music hpaji hpe shalat shapan ai magam bungli hpe galaw let, tinang a mare buga de bai du wa ai ten hta kalang ta nawku hpung hpe greng grak ai hku nna music hpaji hte daw jau wa lu ai, woi awn wa lu ai ni byin tai wa lu na matu yaw shada ai re” nga nna Sama Ginwang Hkalup Hpung Ginjaw Music Komiti Hpa-awn Rev. Hkalam Gum Hpan Lat tsun ai.
Sharin hpawng hta Sama Ginwang hte Manmaw Ginwing kaw na sharin Sara/num ni sa du sharin ya na re. Guitar hte Keyboard hpaji hpe gaw Sara Hpauwawng La Ja kaw na sharin ya ai rai nna, Site Thingking hte seng nna Saranum Nhkum Lamai Merry Pan kaw nna sharin ya na re hte Theory hte seng nna gaw Saranum Maji Merry Nu Ja kaw nna sharin ya na re hpe chye lu ai.
Sharin hpawng hta Sama Ginwang kata buga hpung shagu hte Hpyen yen Camp shagu na Sara/num ni, Camp hpe woi awn nga ai komiti ni yawng marai 34 tup sa du sharin hkamla nga ai re lam chye lu ai.
