Rev. Dr. Maran Ja Gun nnga mat ai (4) ning hpring myitdum wunli la akyu hpyi hpawng galaw

Rev. Dr. Maran Ja Gun nnga mat ai (4) ning hpring myitdum wunli la akyu hpyi hpawng hpe February shata 29 ya jahpawt hkying 10:00am aten hta Laiza Buga Hkalup Hpung Rev. Maran Naw Masat Nawku Htingnu kaw galaw ai lam chye lu ai.

Myitdum wunli la akyu hpyi hpawng hpe Laiza Buga Hkalup Hpung hte dum nta masha ni lit la nna galaw ai re lam chye lu ai.

Rev. Dr. Saga Hkyen Naw kaw nna “Myit dum let n-gun la hkan sa ga” ngu ai ga baw hte Karai Kasang a mungga hpe htawn tsun n gun jaw ai rai nna, Rev. Chyang Maja Tu Shan kaw nna hkumtsup akyu hpyi ya ai re.

Rev. Dr. Maran Ja Gun Asak (70) ning gaw hkumhkrang hkamja lam a majaw, Laiza dum nta kaw lai wa sai 2016 ning February shata 29 ya shani Madu Yesu hta yup pyaw mat wa sai shi a hkumtsawp moimang hpe gaw Myitkyina Hkristan lupding lupra Nawng Nang de makoi mayang sai rai nna, 2020 ning February shata 29 ya shani gaw (4) ning hpring sai rai nga ai.

Myitdum wunli la akyu hpyi hpawng hta Manmaw, Myitkyina hte Laiza buga na hpung masha makying jinghku ni yawng marai 900 daram sa du shang lawm ai lam chye lu ai.