Namhkau San Mare dingsa makau kaw KIA hte Myen hpyen hpung ni gasat gala majan byin
Mungmyit Sinli Ga (Kachin Sub-state) KIA Dap Ba 10, Dap Dung 2 ginra de, shamu shamawt shang wa ai Myen Hpyen Dap, Dapnu 99 kata na hpyen hpung hte KIA Dap Dung 2, Kung 4 hpyen hpung ni March shata praw 1 ya shani hkying 11:20am aten hta Huhin bum npu Namhkau San mare dingsa makau kaw gasat gala majan byin ai lam chye lu ai.
“Myen Hpyen Dap, Dapnu (Tatma) 99 kata na Hk.M.Y masat gade re gaw atsawm n chye shi ai, hpyen n-gun 180 daram re. Myen hpyen ni gaw Nahkai mare maga de na anhte ni nga ai Huhin lam maga de htu shadut lung wa ai majaw, hkap shingla gasat dat ai re” nga nna shawng lam na salang langai tsun dan ai.
Ya aten hta KIA Dap Ba 10, Mungji Ginwang Loi Tawng Bum mayan hkan hkai shatut tawn ai ka-ni yi ni hpe KIA hpyen hpung ni hkyen jasan nga ai aten e, Myen hpyen hpung ni hte gasat poi mung byin nga ai re.
Lai wa sai February shata 22 ya shani hta mung, KIA Dap Ba 10 hte Dap Nawng Dap Dung 37 hpyen hpung ni shara jahkrat nga ai, Mankawng Nawng maga de, Myen Hpyen Dap, Dapnu (Tatma) 99 kata na hpyen hpung ni shadut sa wa ai majaw, gasat poi byin ai lam chye lu ai.
