(17) lang na jawng awng masat shagrau hpawng galaw
Waimaw Chyum Jawng a (17) lang na jawng awng masat shagrau nawku lamang hpe March shata praw 5 ya shani Waimaw Chyum jawng wang Sinpraw Majoi Lung Byit Gawknu kaw galaw ai lam chye lu ai.
C.Th awng pru jawngma marai 9, L.Th awng pru jawngma marai 20, B.Min awng pru ai marai 3 hte B.Th awng pru jawngma marai 4, awng pru jawngma yawng marai 36 re lam chye lu ai.
Ningtawn kumhpa masat shagrau ai lam galaw ai hta C.Th pang kaw No.1 hpe Labang Tu Mai (Chying Htawng Pa Buga), No.2 hpe Luksing Bawm Win (Lahpai Buga), No.3 hpe Jangmaw Mung Dan Awng (Laiza Buga), L.Th pang kaw na No.1 hpe Lamuk Lum Lam (Zangnawng Buga), No.2 hpe Lashi Hkawn Din (Shwegu Buga), No.3 hpe Hpanang Ja Bu Ra (Lung Sha Yang Buga), B.Th pang kaw na No.1 hpe Lagyawm Hkaw Chyang (Wuyan Buga), No.2 hpe Nhkum Seng Awng (Mungna Lawang Buga), No.3 hpe Maru Nang Roi (Mali Yang Buga) ni hkam la lu ai lam chye lu ai.
Dai ning na Waimaw Chyum jawng jawngma yawng marai 93 nga ai rai nna, aten hpring/aten chyen sharin Sara/num ni yawng marai 23 re hpe mung chye lu ai.
Dai ning na jawng yu hpawng hta B.Th hte B.Min pang gaw shawng nnan lang jawng yu ai re lam, jawng yu hpawng hta hpung shawa masha yawng marai 700 jan sa du shagrau lawm ai lam chye lu ai.
Waimaw Chyum jawng hpe laiwa sai 2001 ning kaw na hpaw ninghtan wa ai hta shaning hku rai yang 20 ning de lahkam wa sai re majaw, Karai Kasang hpe chyeju dum ai lam, ndai chyum jawng hpe grau rawt jat galu kaba wa hkra matut galaw sa wa na lam hta buga de nga ai nawku hpung kanu kawa ni lam magup hku nna garum madi shadaw ya ai a marang e chyum jawng mung daini du hkra ngang grin nga lu ai re. Waimaw chyum jawng a shawnglam a matu mung nawku hpung kanu kawa ni hku nna hpaji jaw n-gun jaw shadum jahprang ya na matu Waimaw Chyum Jawng Up Rev. Htawshe Dau Hkawng tsun lajin da ai.
