Myen hpyen ni rim mat wa ai Mung masha ( 2 ) a shiga nna lu mat ai majaw myit tsang nga

December, 13 ya shani Mung Gu mare, Hpawng Seng Ninghtawn,  Kawng Buk mare na Mung masha Slg. Lagwi Bawm Yaw hte Shd. Mun Daw La Di yan hpe Myen hpyen ni rim woi mat wa ai kawn ya du hkra

hpa shiga mung n-na lu mat ai majaw mare masha ni hte nta masha ni myit tsang nga ai lam buga masha ni kawn chye lu ai.

Kawng Buk mare gaw Nta htinggaw ( 20 ) daram sha nga ai mare kahtawng re lam, Myen hpyen ni rim mat wa ai Slg. Lagwi Bawm Yaw gaw Madu jan hte kasha marai ( 4 ) lu ai re lam, Shd. Mun Daw La Di gaw asak 18 ning rai nhtawm Kawa Slg. Hkaw Wai hte Kanu La wang yan a shadang sha re lam chye lu ai. Dai ginra hta Myen hpyen ni kawn mare masha ni hpe jahkrit shama ai lam ni galaw ai majaw mare masha ni law malawng nam de naw koi yen nga ai lam chye lu ai.