Masat yan (12) Hpu-Awn Shalat jawng yu hpawng galaw
Wunpawng Mungdan Shanglawt Asuya Mungchying Uphkang Dap kawnna hpaw sharin ai, masat yan (12) Hpu-awn Shalat jawng yu hpawng hpe March shata 12 ya jahpawt hkying 9:00am aten hta DGA Hpung Wa Gawknu kaw galaw ai lam chye lu ai.
Daini jawng yu ai jawngma ni gaw, La marai 52 hte Num marai 3, yawng marai 55 re. Jawng yu lakmat hpe Salang Kaba Ndau La Seng (Hpu-Awn Shalat Jawng Up) kaw nna jawng yu lakmat jaw ya ai.
Jawnglung ladaw hta ningtawn kasi hte laika ningtawn No.1 kumhpa hpe Shadang Labau Ting Kyi hkam la lu ai, No.2 kumhpa hpe Shadang Lahpai Brang Seng, No.3 kumhpa hpe Shadang Lahi Ze Dau ni hkam la lu ai, kumhpa hpe DGA lithkam hte Slkb. La Gawng Tawng La (Jawng Komiti Ningbaw) yan kaw na shagrau ya ai.
DGA Lithkam Salang Kaba Labya Tang Gun kaw nna jawng yu mungga tsun ai hta “Uphkang Du ni hta ra ai machyoi hpaji hte nanhte hpe mawn sumli dat ai hkum raw kau, tawk hprut sadi dung apnawng na myu tsaw myit, mung tsaw myit ntawng nhtu nanhte hpe jahpye dat ai, hkum tat kau, n gup n gau hta nkaw nwai ai ga pru na matu Karai mungga nli bang dat sai, pawt sin dawng myit hte hkum galai kau, ali ama tai na matu san dat sai, arawng aya hte hkum galai kau, awng padang dip na matu hpyen zai ningsang sharin ya dat sai kunjun (Mayam) akyang hkum shatai kau, madat mara lam nga na matu hpyen training sharin ya dat sai, lagawn lamawn hte hkum lale kau, mungdan hte amyu a matu san da sai prat hpe tinang hkum up hpang, myit hpraw san ai hte bungli galaw na sharin matsun dat sai, tinggyeng akyu hkum shalawm kau, rit kawp tara shadik shatup lam achyin ya dat sai arawng aya hte hkum up kau” nga nna jawng yu munga tsun ai.
Matut nna Sara Kaba Kumhtat Hting Nan (Ninggawn Amu Madu) kaw nna mung, “Wunpawng Mungdan Shanglawt Rawt Malan ai magam bungli gaw mungchying mungshawa hta n-gun tawn nhtawm, mungshawa ni hpe dawhpum dawnu shatai nna mungchying mungshawa ni a shingma kaw tsap let, daini rawt malan magam bungli hpe galaw nga ai lam gaw nambat langai ahkyak ai. Dai re majaw mungshawa hta shamyet shanat nna, dawhpum dawnu hku nga taw nga ai mungshawa ni hpe grau nna, tatut kanawn mazum gahkyin gumdin woi awn zinlum sa wa na matu gaw, mungchying magam dap ni a lit rai nga ai re” nga nna hpaji jaw shatsam mungga tsun ai.
Masat yan (12) Hpu-awn Shalat jawng yu hpawng hta Sara Kaba Sumlut Gam (KIO Tingnyang Up Malai II), Du Daju Zawngbuk Htan (KIC Ningbaw Malai II) hte rau, Magam Dap, Makan Dap shagu na saw shaga da ai magam gun ni, nawku hpung woi Sara ni, jawngma kanu kawa ni, masat yan (13) hte (14) hpu-awn shalat jawngma ni yawng marai 700 daram sa du shang lawm ai lam chye lu ai.
