Mungkan Hkashi Hkanu masat ninghtoi hpawng lamang galaw

Myitkyina Gaiwang Tanghpre Lungga Zup Mare Mali Hka kau kaw masha n gun yawng marai 100 jan hte March shata 14 ya shani Mungkan Hkashi Hkanu Masat Ninghtoi hpawng lamang galaw ai lam na chye lu ai.

Hpawng hpe Mali Nmai Buga masha ni hte Htoi Gendar and Development Foundation ni pawng nna galaw ai re. Lamang hpe jahpawt hkying 9:00am aten kawn hkying 11:00am aten laman galaw ai re.

Hpawng lamang galaw ai yaw shada lam hpe Mali Nmai buba masha rai nga ai, Saranum Nhkum Ja Hkawn (Mungchying Rawt Jat, MRJ) kaw nna ya na zawn tsun ai.

“Karai Kasang hpan da ai makau grup yin hpun, kawa, hka shi, hka nu, hpe grau nna manu shadan chye na matu, Myen mungdan ting a asak hka nu kaba rai nga ai Mali hka hpe gumhpraw lu ai maigan masha ni a matu akyu jasawn kau ai lam nbyin u ga, anhte a mungdan kaw sha, tut dinggrin lwi nga u ga ngu yaw shada let galaw ai lam re”

Lamang hta nawku hpung woi sara ni akyu hpyi ai lam, Hka hte Amyu Shayi ni a lam, ngu ai ga baw hpe Tara Kasa Saranum Sar Li Thwi kaw nna lakjet jaw ya ai, dai hpang mungkan hkashi hkanu nhtoi byin wa ai lam, makau grup yin lam hte tara upade lam hpe, Tara Kasa kaba Saranum Doi Bu kaw nna lakjet jaw tsun dan ai re lam, Saranum Ja Hkawn tsun ai.

March shata 14 ya shani gaw, Mungkan Hkashi Hkanu Masat Ninghtoi ngu, lai wa sai 1997 ning March 14 ya shani Brazil Mungdan kaw nna byin pru wa ai re lam chye lu ai.

Tanghpre Mali Nmai Zup Buga de, ya na zawn Mungkan Hkashi Hkanu masat ninghtoi hpawng lamang hpe lai wa sai 2012 ning kaw nna galaw hpang wa ai re hpe mung chye lu ai.

Photo credit; Nhkum Ja Hkawn