TNLA hte Pan Se Pyi Tu Tsit ni gasat gala majan byin
Mungmyit Sinli Ga (Kachin Sub-state) KIA Dap Ba 6, Dap Dung 9, Kung 2 ginra, Pan Se Bum kaw March shata 15 ya jahpawt hkying 5:00am aten daram kawn shana daw hkying 2:30pm aten du hkra, TNLA hpyen hpung ni hte Pan Se Pyi Tu Tsit ni gasat gala majan byin ai na chye lu ai.
TNLA hpyen hpung ni, pat jasat bungli shang nga ai ten, Pyi Tu Tsit hpyen hpung ni hkan je la wa ai majaw, dai kaw gasat poi byin hpang wa ai re lam, shawng lam na Salang langai tsun dan ai.
Namhpakka mare kaw dap jung shara jahkrat nga ai, Myen Hpyen Dap Hk.L.Y 123 dap ni mung, majan byin ai shara de 105mm laknak kaba hte 7 lang gap bun ai lam, ginra shi sawk ni kaw na chye lu ai.
Gasat poi byin ai shara hta P.T.Ts maga na si hkala ai lawm ai zawn, Ka-ni, hpyen arung arai hte hpyen la marai 8 hpe mung TNLA ni lu rim ai rai nna, TNLA maga gaw hkala ai marai 3 lawm ai re lam, TNLA shiga lawk kaw na chye lu ai.
