Covid-19 ana zinli makawp ninghkap sa wa na lam hte seng nna bawngban hpawng galaw

Wunpawng Mungdan Shanglawt Asuya, Ginjaw Komiti kaw na hpaw tawn ai Covid-19 ana zinli makawp ninghkap komiti ni woi awn nna, ana zinli hpe tau hkrau makawp maga ninghkap sa wa na bungli masing hte seng nna bawngban ai zuphpawng hpe March shata 25 ya shani hkying 11:00am aten hta Laiza Muklum Padang Hkrun Lam Majan Masing Woi Awn Rung kaw galaw ai lam chye lu ai.

“Ginjaw Komiti kaw na hpaw dat ya ai Covid-19 ana zinli makawp ninghkap komiti a magam bungli ni gara hku galaw sa wa na ngu ai lam hpe, Hkamja Dap kaw nna Ginjaw de tang da ai lam hte ya yang na byin taw nga ai sat lawat mabyin ni hta hkan nna, gara hku galaw sa wa ra sai ngu ai lam lahkawng hpe hkut hkut nai nai jawm bawngban ai re, dai ni dawdan la lu sai lam ni hte dawdan ra ai matsun ra ai lam ni hpe gaw seng ang ai ntsa de tang madun nna bai galaw shagrin la nna, tatut lit la sa wa na re” nga nna Covid-19 ana zinli makawp ninghkap komiti Amu Madu Du Kaba Lahpai Hing Wawm tsun ai.

Zuphpawng hta ana zinli hte seng nna ya jang galaw sa wa ra ai lam ni, hkum pat ra ai lam ni, hkan sa ra ai lam ni, madung gaw masha law law hpawng chyawm ai lam, hkawmsa hkawmwa poi shingra kaba ni n galaw na lam ni, seng ang ai bungli hte seng ai masha ni hpe gara hku matut mahkai ai mahkri shawn ai lam, ana zinli makawp ninghkap komiti hte komiti a bungli ni hpe chye shangun dat ai lam rai nna, komiti a ra ai magam bungli ni hpe bai garum madi shadaw sa wa lu na matu hte ana zinli makawp ninghkap rung hpe hpaw nna, ana makawp maga ai magam bungli hpe tatut hkrang shapraw galaw sa wa na re lam, Du Kaba Lahpai Hing Wawm tsun ai.

“Covid-19 ana zinli makawp ninghkap komiti hpe Wunpawng Mungdan Shanglawt Asuya, Ginjaw Komiti kaw nna 2020 ning, February shata praw 7 ya shani hpaw shagrin da ai re. Dai ni hpawng la lu ai hta magam bungli ni tsawmra ahkyak ai daw hpe dawdan la lu ai. Shawoi gaw zuphpawng hpe komiti hku nna hpawng la bawngban la ai lam ni galaw ai gaw tang nau ndu ai hpe mu lu ai, ahkyak daw ni hpe dai ni bawngban la lu sai re majaw bungli galaw ai lam hta grau nna masan sa wa sana re ngu kam ai” nga nna Covid-19 ana zinli makawp ninghkap komiti Ningbaw Sara Kaba Sumlut Gam (KIO Ginjaw Komiti Tingnyang Up Malai II) tsun ai.

Hkum kahtet shadang jep chyoi ai lam hpe lai wa sai ten hta gaw, shang wang kaji ai hku galaw nga ai raitim, ya hpang daw de Magam Dap, Uphkang Dap, Hpyen Dap, Hkamja Dap ni hte CSO ni shang lawm nna grau dam lada ai hku yawng jawm galaw sa wa na re lam chye lu ai.

Bawngban hpawng hta Du Kaba Sumlut Gun Maw (Ningbaw Malai), Du Kaba Zungbuk Htan (Ningbaw Malai II), Magam Dap shagu na hpu-awn ni, nawku hpung woi Sara ni, NGO, CSO ni yawng marai 40 jan sa du shang lawm bawngban ai lam chye lu ai.