Kokang MNDAA hte Myen hpyen hpung ni shara 2 kaw gasat gala majan byin

Mungmyit Sinli Ga (Kachin Sub-state) KIA Dap Ba 10, Dap Dung 17 ginra hta shamu shamawt hkawm nga ai, Myen Hpyen Dap, Dapnu 99 kata na hpung ni hte Kokang MNDAA hpyen hpung ni, March shata 26 ya shani ka-ang hkying 12:30pm aten hta Bang Ya Yung Bum (Relay Kawng) kaw gasat poi byin ai lam chye lu ai.

Myen hpyen ni gaw, Lashio maga na hpyen modo 6 hte lung wa ai hta modo 3 Namhkai kaw hkring ai, modo 3 gaw Bang Ya Yung Bum (Relay Kawng) de lung wa ai kaw Kokang MNDAA hpyen hpung ni hkap gap ai kawn minute 30 daram gasat poi byin ai lam, shawng lam na Salang langai shana wa ai.

Dai na maga hkying 4:00pm hte hkying 5:00pm aten laman hta mung, Hu Hup Gadawng hte Mankawng Bum kaw Dap mying n chye ai Myen Hpyen hpung hte MNDAA hpyen hpung ni gap hkat ai lam chye lu ai.

Ya aten hta Namhkai gyup yin hta Myen hpyen n gun 200 daram rawng nga ai rai nna, KIA ni nga shara de shani kahtep wa ai rai yang gasat gala majan matut byin wa mai ai lam, ginra shi sawk ni kaw na chye lu ai.