Htang Nya mare kaw shinggan manam n shang shangun sai
Loi Je Ginwang, Htang Nya mare kaw March shata 31 ya shani kaw nna mare de shang wa ai shinggan manam kadai hpe raitim nshang shangun sai lam chye lu ai.
“Shinggan manam sha nre ai, tinang nta masha raitim mung, miwa mungdan hkan bungli galaw ai zawn re masha ni hpe gaw bai wa na rai jang mungshawa tsi rung hta nhtoi 14 ya jep chyoi ngut ai hpang she tinang nta buga de shang wa lu na re.” nga nna Loi Je Laksan Ginwang Daw, Amyu Shayi magam gun Nhkum Hkawn Nan tsun ai.
“Nawku hpung ni hta mung akyu hpyi hpawng ma hkra hpe gan jahkring da sai raitim, shani ka-ang nawku hpawng hpe gaw ana makawp tsi gat ai hte lata gashin shara ni galaw nna, minutes 45 nawku hpe galaw nga ai re lam” matut tsun ai.
Hkamja lam hte seng nna hpaji jaw ai lam ni mung dingyang galaw nga ai re.
Daini du hkra rai yang shinggan masha langai du wa ai majaw, ana maram masam masha hku nna, mung shawa tsi rung kaw jep chyoi hkam la nga ai lam chye lu ai.
