Mying nchye ai masha langai gap sat hkrum
Mungmyit Sinli Ga (Kachin sub-state) KIA Dap Ba 6, Dap Dung 36 ginra, Hpai Kawng mare ntsa Dung Aw Bum kaw April shata praw 1 ya shani, mying nchye ai asak 20 ning jan daram re la langai hpe gap sat da ai lam na chye lu ai.
Mabyin hte seng nna Hpai Kawng mare na salang langai tsun ai hta “Mungbaw mare na bungli wa galaw sha ai Miwa la ngai tsun ai gaw, jahpawt hkying 4 hte hkying 5 lapran hta sinat ngoi ai nsen gaw na dat ai raitim hpa re gaw nchye ai nga tsun ai, yi kaw nga ai ni hka ja sa yang lam makau kaw masha langai si taw ai mu ai majaw, anhte hpe wa tsun dan nna anhte mare salang ni yawng hkra lung wa yu yang, masha ndai anhte Myen mung masha gaw nrai mawt ai, law malawng Miwa mung masha mai byin ai” nga nna tsun ai.
Gap sat da ai masha hta shingdu de hpri (Let Htik) hte mung naw gyit da ai rai nna, la hkra maga shapyi hku gap sat da ai lam chye lu ai.
Moi mang hpe April shata praw 1 ya shana maga hkying 5:00pm aten daram hta ninghtawn salang ni, Hpai Kawng mare salang ni, Hka Lum mare salang ni hte Kawng Ra mare salang ni wa nat kau sai rai nna, April shata praw 2 ya shani makoi mayang kau sai lam chye lu ai.
Hpa majaw gap sat hkrum ai mabyin lawng lam hte seng nna, lit nga ai salang ni matut sagawn nga ding yang re hte dai shara hta ya na zawn re masha gap sat ai manghkang ni nbyin ga shi ai lam, buga masha ni tsun ai kawn chye lu ai.
