Miwa hkran pru shang shagyit ni hpe tara shang gan pat
Covid 19 ana zinli a majaw Muse shagyit ni hte Miwa hkran pru shang shagyit hpe April shata praw 1 ya shani kaw nna tara shang gan pat da ai lam chye lu ai.
Jinghpaw Mung de gaw lawu ga na masha ni grai shang ai re majaw, shawng kalang hkan gaw shagyit kaw Muse Ginwang, M.S.K mungchying masat lang ai ni hpe sha jashawn ai, lawu ga na ni hpe n jashawn ai lam hpe yu yang Myen Mung de na shang wa na ana hpe hkrit ai majaw shagyit hpe pat kau ai masa re lam, KBC Mungmau Ginwang Amu Madu Rev. Lahpai Zau Ra tsun ai.
Muse shagyit ni hte Miwa hkran pru shang shagyit ni yawng pat da sai, modo kaba sha shang sai re. Shagyit hpe galoi du hkra pat na ngu ai hpe aten masat da ai lam nnga ai raitim, shagyit hpe Miwa kaw nna pat ai re majaw, Miwa ni hpaw yang bai hpaw na masa nga ai lam, Rev. Lahpai Zau Ra tsun ai.
Gun rai htaw ai modo kaba gawt ai masha ni hpe gaw Miwa hkran kaw madung jep chyoi nna, Myen Mung shang wa ai shagyit kaw mung hkum kahtet shadang shadawn ai lam galaw ai.
Muse Ginwang kata hta ana kap ai ntsen nhten masha nnga shi ai rai nna, ana maram masam ai masha hte ana ntsen nhten masha ni nga wa yang masat da ai shara kaw Quarantine galaw nna tsi gawn lajang ai lam galaw na re hte Muse lu sha seng ni hta gaw lu sha hpe seng kaw nsha shangun ai sha nta de la wa na matu Apri shata praw 1 ya shana kaw nna ndau da sai lam chye lu ai.
Ya aten Mungdan shara law law hta chyam bra nga ai Covid 19 ana zinli a majaw Myen Mung kaw na pru/shang shagyit ni gan pat da sai rai nna, Laiza Muklum kaw na Miwa hkran pru/shang shagyit hpe mung March shata 31 ya shana hkying 12:00noon aten hta tara shang pat kau sai re.
