Loihkyep mare hpung masha ni hte Balawng (Ta-ang) ni lamu ga gashun manghkang byin
Mungmyit Sinli Ga (Kachin Sub-state), Mung Mau Ginwang, Mungwi Buga Loihkyep mare hta April shata praw 1 ya shani hpung masha ni hte Balawng (Ta-ang) ni lamu ga gashun manghkang byin ai lam chye lu ai.
Mabyin hte seng nna, Mungwi Buga na Hpungtau Dingsi Tu Awng kaw nna ya na zawn tsun ai. “Ndai lamu ga shara kaw lai wa sai 1961 ning hta nawku jawng gap let, nawku hpang wa ai shara rai nga ai, 1981 ning hta ndai ginra kaw Pyi Thu Tsit Hpyen Dap hpaw na matu hpyi lajin wa ai majaw, kaji kawa ni a sakse laika hte atsawm ka tawn da ai lam nga ai. P.T.Ts Hpyen Dap dawm ai hpang gaw, Loihpyek ni a nawku shara bai rai na re nga tsun da ai.
2012 ning hta P.T.Ts ni dawm mat wa ai hpang, Loihpyek mare nawku dum nta, Udang ni jun na matu hkyen lajang nga ai ten, shanhte mung ndai shara hpe ra marin wa ai majaw, Gawkngu Hpara shadun na matu tsun wa ai raitim, anhte ninghkap nga ding yang kaw 2019 ning, June shata 30 ya shani hta ga htu mawdaw ni hte shara wa ganaw hpang wa ai, dai kaw na shanhte hte manghkang pru wa ai re” nga tsun ai.
Ndai lamu ga hte seng nna Mungwi Buga hpung ni gaw, Asuya Namhkam Tara Rung de laika bang ai lam galaw ai, Balawng (Ta-ang) Uphkang Rung ni hku nna mung, lahkawng maga na masha ni hpe shaga la nhtawm, nanhte shada pri nem ra ai re n rai yang, shada ganawn mazum lam, anhte a Dap Hpawm hta mung ahtu hkra wa mai ai, Udang mung baw kau, Gawkngu Hpara mung run kau nna, lahkawng maga pri nem ai shani she, kadai hte seng yang kadai bai galaw na matu tsun ya lai wa sai re.
2020 ning March shata 31 ya shani hta Balawng (Ta-ang) ni hku nna, Gawkngu Hpara bai galaw hpang wa nna, Mungwi Buga masha ni mung, April shata praw 1 ya shani hta Udang jun na matu nhkun htu nga yang manghkang bai byin wa na hkyen ai majaw, mare makau kaw dap jung nga ai Myen Hpyen Dap, Hk.L.Y 130 dap na Hpyen Du wa sa wa nna, Namhkam Tara Rung de sa nhtawm, dai kaw na mahtai lu jang she bai galaw na matu sa tsun jahkring da ai lam, buga masha ni tsun ai kawn chye lu ai.
Ndai amu manghkang hte seng nna April shata praw 2 ya shani hta Loihpyek hpung masha ni, Namhkam tara rung de lahkawng lang ngu na laika mara da sai hte ကခ်င္တိုင္းရင္းေရးရာ၀န္ျကီး kaw du hkra, laika mara da sai lam chye lu ai.
