Myitkyina hte Waimaw hpyen yen camp ni hta Covid-19 ana zinli makawp tsi gat
Kachin State Covid-19 Prevention Network Group ni kawn April shata praw 1 ya shani kaw nna, Myitkyina hte Waimaw hpyen yen camp ni hta covid-19 ana zinli hpe makawp lu na matu tsi gat ai lam hpe matut manoi galaw nga ai lam chye lu ai.
Tsi gat da ngut sai hpyen yen dabang ni gaw, Jan Mai Kawng RCM hpyen yen dabang, Jan Mai Kawng KBC hpyen yen dabang, Maina RCM hpyen yen dabang hte Maina KBC hpyen yen dabang ni hta re.
“Anhte a yaw shada lam gaw, anhte shinggyim masha ni hpe jahkrit shama nga ai ana virus ndai hpe hkoi tsai lu wa na matu, shawng nnan yaw shada ai re. Bai nna anhte mungdan gaw matsan ai mungdan re. La ma na laja lana byin wa yang mung seng ang ai Asuya kawn grak lagra di lit la ya na atsam nnga ai hpe mu mada ai.
Dai majaw anhte ginra hta grak lagra byin wa yang tinang nan gara hku makawp maga na ngu hpe tau hkrau hkyen lajang lu na matu re. Bai nna hpyen yen ni hta marai langai mi byin wa jang gaw grai yak wa ai baw re. Nbyin hkra gaw hpyen yen ni hta madung tawn nna galaw hpang wa ai re” nga nna Kachin State Covid-19 Prevention Network Group malawm Sara Paul Lu tsun ai.
Matut nna, Myi nmu jawng hte laga masha law law hpawngchyawm ai shara hkan mung galaw sa wa na re, n-gup magap (Mask) hpe garum hpyi da ai lam nga ai, shanhte jaw wa ai shaloi, hkan garan ya ai lam mung nga wa na re lam, Sara Paul Lu tsun ai.
Ndai lamang hpe wuhpawng langai sha lit la na galaw ai nre sha, KSPP party na ramma ni, CSO kaw na salang ni hte Myitkyina ginra kaw nga ai ramma ni yawng jawm myit hkrum let, Kachin State Covid-19 Prevention Network Group hpe hpaw shabawn la nna, magam bungli hpe jawm galaw sa wa ai re lam chye lu ai.
