Gasat poi byin ai majaw dum nta jawng ni sinat gap hkrum
Myen Hpyen Dap hte TNLA ni gasat poi byin ai majaw, Jinghpaw wang kaba mare na dum nta, nawku jawng hte hpaji jawng ni sinat hte gap hkrum ai lam, buga masha ni shana wa ai kaw na chye lu ai.
“Gap hkrum ai shara ni gaw Salang Hpauyam Brang Di a dum nta, Hpaji jawng, Nawku jawng, Ma Shalet jawng hte Wa langai hkra mat ai re” nga nna Jinghpaw wang kaba mare na Salang langai tsun ai.
TNLA ni gaw Nawku jawng hte Ma shalet jawng hpe ninggang tawn nna gap ai re hte Myen hpyen hpung ni mung mare shinggan kaw nna bai nhtang gap dat ai re majaw mare masha ni kaw hkra machyi ai lam nnga ai raitim, jawng nta ni hkra mat ai re lam Salang wa matut tsun ai.
Gasat poi byin wa ai majaw Jinghpaw wang kaba mare kaw na mungshawa ni gaw Balawng wang kaba mare de hprawng yen mat ai raitim, Lahkyang Yang mare na mungshawa ni gaw, Balawng ni kaw shingbyi taw nga yang, shinglum lam nau nnga na re majaw, hpyen yen ni hpe sa woi la ai rai nna, ya aten hpyen yen mungshawa ni gaw Jinghpaw wang kaba mare kaw bai du sai lam chye lu ai.
Jinghpaw wang kaba mare kaw nta htinggaw 20 jan shanu shingbyi nga ai rai nna, ya aten hpyen majan a majaw mare kata hten hkrum mat ai dum nta ni hpe kadai ni kaw nna mung, lit la ya ai lam nnga shi ai re hpe chye lu ai.
Hpaji jawng hte Ma shalet jawng ni grai hten hkrum mat ai re majaw, mungmare masha ni myitru myit tsang hkrum nga ai sha n-ga, nta hkra mat ai dum nta ni mung myit yak nga ai re majaw, garum ningtum jaw mayu ai ni nga wa yang mung, ndai Phone hkringdat 09257805179, 09256539138 (Buga masha) ni kaw matut mahkai wa mai ai re.
Lai wa sai April shata praw 5 ya shani TNLA hte Myen hpyen hpung ni gasat poi byin ai majaw Jinghpaw wang kaba mare kaw na Nawku jawng, Hpaji jawng, Ma shalet jawng hte dum nta ni sinat gap hkra mat ai re sha n-ga, mungmare masha ni mung gan hprawng yen ra mat ai re.
