Hpakant Muklum kata shang wa ai lam ni pat na

Covid-19 ana zinli a majaw, Jinghpaw Mungdaw Asuya kaw nna Hpakant Muklum kata de shang wa ai lam ni hpe April shata 12 ya shani kaw nna 30 ya shani du hkra, tara shang pat na matu ndau da sai lam na chye lu ai.

Masha jen jep ai hku nna Hpakant de shang wa ai lam ni hpe sha pat ai rai nna, Muklum kaw na pru wa ai ni hpe gaw npat ai re.

Lam hpe April shata htum du hkra sha pat ai re majaw, yak hkak ai lam ni nga wa yang, Asuya, CSO, NGO wuhpung wuhpawng ni hte nawku hpung ni kaw nna garum ningtum jaw ai lam ni galaw sa wa na re lam, Hpakant Amyusha Zinlum Hpung Amu Madu Salang Dashi Naw Lawn tsun ai.

“Hpakant Muklum kata hta laklai masa gaw, grai nnga shi ai raitim, Miwa Mungdan kaw bungli sa galaw nna bai nhtang wa ai masha ni nga ai, nkau mi gaw wa makoi taw nga ai zawn re ni nga ai re majaw, ya gaw wa makoi taw ai zawn re ni hpe chye jang lawan shiga jaw, nhtoi 14 ya tsi jep hkam na matu ndau shabra da ai” nga nna Salang Dashi Naw Lawn tsun ai.

Hpakant Muklum kata hta gaw Covid-19 ana zinli makawp maga lam hte seng nna hpaji jaw ai lam, bungli ahkyak ai lam hta lai nna nhkawm sa na lam, tinang a nta kaw sha nga na matu ndau shana hkawm ai lam galaw nga ai re.

Miwa Mungdan kaw na bai wa ai manam ni hpe mung lawan shiga jaw na lam, shanhte nga na matu tsi rung kaw shara lajang da ai nhtoi 14 ya ana sa jep chyoi hkam na matu lajang da ai lam chye lu ai.