Covid-19 ana zinli makawp maga ai hku nna nhtoi 14 ya maram masam masha tawn hpang sai

Wunpawng Mungdan Shanglawt Asuya Covid-19 Ana Zinli Makawp Ninghkap Komiti kaw nna woi awn nhtawm, Laiza de du shang wa ai mungshawa masha ni hpe April shata 11 ya shani kaw nna, Mai Sak Pa mare hkamja lam jep chyoi shara kaw nhtoi 14 ya ana maram masam masha tawn hpang nga sai lam chye lu ai.

April shata 12 ya shani du hkra rai yang, ana maram masam tawn ai masha marai 12 rai nna, ndai maram masam masha ni gaw, Myitkyina, Waimaw, Manmaw, Nmawk, Danai, Sam Mung, Namsan Yang hte Namngau mare kaw na Laiza de du shang wa ai mungshawa masha ni re.

Nhtoi 14 ya maram masam masha ni hpe shani shana hkum kahtet shadang shadawn nna, nhtoi 14 ya hpring ai hpang lak lai ai lam hpa nnga ai, hkamja lam hkrak ai masha ni hpe gaw, Hkamja Dap kaw nna hkamja lam madi shadaw laika jaw nhtawm, tinang buga de bai wa lu na matu lam masan da ai re lam, Mai Sak Pa Check Point Dabang Up Hpakawn Seng Li tsun ai.

Covid-19 ana zinli makawp ninghkap komiti kaw nna gaw, nhtoi 14 ya maram masam mung masha ni hpe tinang na jarik hte tinang lu sha na matu hte grai yak hkak ai ni hpe sha asuya kaw na jaw lu jaw sha na matu laika shapraw da ai raitim, ya gaw lu sha jarik gun na nga hkawm ai ni nre majaw, shat ni shadu jaw ra ai sha n ga, sabya, wa htu tsi kaw na hkawt ra taw nga ai lam, Salang Kaba Hpakawn Seng Li tsun ai.

Shani shagu lit nga ai tsi Sara ni kaw nna ding yang jep chyoi nhtawm, laklai nna ntsen nhten ai masha ni nga wa yang mung, seng ang ai ana zinli hte seng ai komiti de tang madun ap na matu hkyen lajang da ai re lam chye lu ai.

Covid- 19 Ana Zinli Makawp Ninghkap Komiti hpe lai wa sai February shata 7 ya shani hpaw hpang ai rai nna, Ginwang Ginjaw shara shagu de mung Covid-19 Ana Zinli Makawp Ninghkap Komiti hpaw da lu sai lam chye lu ai.