Alen Bum Lahta Tsang Jawng hta covid-19 ana, maram masam masha tawn na
Laiza makau Je Yang hte Hpun Lum Yang lapran na Dumhpawng Zup Alen Bum Lahta Tsang Jawng hta covid-19 ana, maram masam masha hpe tawn na matu, April shata 13 ya shani Covid-19 Ana Zinli Makawp Ninghkap Komiti ni shara sa yu, hkyen lajang ai lam chye lu ai.
Quarantine nhtoi 14 ya galaw nga ai ten hta “Malu masha a matu gaw anhte asuya kawn lit la shadu jaw mat wa na re. Tinang dum nta ni kaw nna garum jaw mayu ai nga yang mung mai ai. Raitim mung madung gaw anhte asuya kawn lit la ai rai na re” nga nna Covid-19 Ana Zinli Makawp Ninghkap Komiti Amu Madu Du Kaba Lahpai Hing Wawm tsun ai.
Ndai shara hta Je Yang, Hpun Lum Yang hte Sut Mu Awng, hkan na hpyen yen mungshawa ni a matu madung yaw shada ai rai nna, nga shara hpe masha marai 100 daram a matu hkyen da ai re.
Wunpawng Mungdan Shanglawt Asuya Covid-19 Ana Zinli Makawp Ninghkap Komiti kaw nna woi awn galaw ai maram masam masha tawn ai dabang hpe Mai Sak Pa hte Mung Lai Hkyet dabang ni hta hkyen lajang da sai re hpe mung chye lu ai.
