Myen hpyen hpung ni hpe KIA hpyen hpung ni shingla gasat

January, 6 ya shani hkying 1:15pm aten daram hta KIA Dap Ba ( 5 ), Dap Dung ( 3 ) ginra, Hpau Daw mare maga hku lung wa ai Myen hpyen hpung ni hpe KIA hpyen hpung ni

shingla gasat ai kawn gasat gala majan byin ai lam chye lu ai.

January, 5 ya shani hta mung, KIA Dap Ba ( 2 ), Dap Dung ( 6 ) ginra Anang Hku, Ura Hka maga de Myen hpyen dap Hk.L.Y ( 102 ) na hpyen hpung ni laknak kaba gap bun ai lam chye lu ai.

KIA Dap Ba ( 2 ), Dap Dung ( 14 ) ginra Mung Hkawm sa lam Nam Byu hka mahkrai kaw January, 5 ya shani kawn Nam Byu maga hku shang wa ai kunrai ni hpe Myen hpyen hpung ni pat hkum nga ding yang re majaw dai ginra hta gasat gala majan bai byin wa na hpe buga masha ni hkrit tsang nga ai lam chye lu ai.

KIA Dap Ba ( 6 ), Dap Dung ( 9 ) ginra, Bang Lung kaw mung January, 5 ya shani hkying 1:40pm aten daram hta TNLA ( 233 ) dap na hpyen hpung ni hte Myen hpyen hpung ni gasat gala majan byin ai lam chye lu ai.