Wa Ra Zup mare makau grup yin kaw Ginra masat Udang shadip hpe jung da sai lam

Wa Ra Zup mare makau grup yin shara ( 4 ) kaw makam masham nawku hpung masum pawnghpawm nhtawm ginra masat Udang hpe akyu hpyi majai nna jung da sai lam chye lu ai.

January, 4 ya jahpawt manap hkying 1:00am aten kaw nna shana daw hkying 4:00pm aten du hkra pawnghpawm hpung masha marai  ( 300 ) jan shanglawm nhtawm ginra masat

Udang ( 4 ) hpe akyu hpyi majai nna Jahtu Zup mare maga Nam San hka mahkrai pawt kaw langai, Nawngmi, Jade Land Company makau kaw langai, Lawt Ja, Pang Lung hka mahkrai kaw langai, Nam Ya, U Ra hka mahkrai makau kaw langai jung masat da lu sai lam chye lu ai.

Udang shadip jung ai a yaw shada ai lam gaw, Yuzana Company ni kawn Hugawng ginra kata shara shagu hkan tara nlang ai hku mung shawa ni a lamu ga madu zingla nhtawm Nai Kadung hte Shaning na na hkam ai hpun ni hkai shatut ai lam ni galaw wa ai majaw Mung shawa ni a htingbut htingra lamu ga ni nmat hkra makawp maga lu na matu jung masat ai re lam chye lu ai.

Yuzana Company sha n ga, Yuzana Company kawn shap da ai lauban ni, Udang shadip jung tawn da ai shara hpe tawt lai nhtawm shara madu shang wa nna Mung shawa ni hte manghkang ni byin wa ai rai yang Yuzana Company kawn lit la hparan ra na re hpe mung chye lu ai.