Phone matut mahkai nlu ai ginra hkan covid-19 ana hte seng nna, ningmu jahpaw hkaw tsun hpawng galaw
Mungmyit Sinli Ga (Kachin Sub-state), Sam Mung Wunpawng Laili Laika Hte Htunghking Ramma Dap ni kaw nna, April shata 13 ya shani covid-19 ana hte seng nna, phone matut mahkai nlu ai ginra, shara ni hkan ningmu jahpaw hkaw tsun hpawng galaw hkawm ai lam chye lu ai.
Htunghkying hku nna hpaw da ai ginwang, ninghtawn kata na mare kahtawng 18 kaw hkaw tsun ai lam galaw na rai nna, April shata 13 hte 15 ya laman ngut hkra galaw sa wa na re.
Hkaw tsun hpawng a yaw shada lam hpe, Sam Mung Wunpawng Laili Laika Hte Htunghkying Ramma Dap Amu Madu Saranum Lahpai Seng Ja Awng kaw nna ya na zawn tsun ai.
“Ndai kap bra ana, anhte a ginra, buga, kahtawng mare hkan ndu shang wa hkra, gara hku jawm sadi na, gara hku jawm makawp maga sa wa na ngu ai hpe yaw shada ai lam re”
Ningmu jahpaw hkaw tsun hpawng galaw hkawm ai ramma yawng marai 17 rai nna, hpaji jaw ai laika pa garan ya ai lam, n-gup magap (mask) hte lata shin ntsin ni hpe mung, gam jaw ai lam chye lu ai.
