Hpaji jawng gawgap ai hta ja gumhpraw ra ahkyak nga
Namhpaka sinpraw buga nawku hpung kaw nna woi awn nhtawm, Namhpaka Sinpraw buga hta hpaw ninghtan da ai nawku hpung mahta hpaji (Church Basic Education) jawng gawgap ai hta ja gumhpraw ra ahkyak nga ai lam na chye lu ai.
Ndai jawng hta myusha nawku hpung hpaji mahta hte kaga sharin ginhpan ni sharin ya ai rai nna, 2020 ning kaw nna gaw madum sumhpa, tingse, dawraw hte music hpaji ni hpe sharin ya na re.
“Yaw shadaw lam gaw nawku hpung kata kaw Wunpawng amyusha ni tinang lagaw tinang tsap wa lu na matu nawku hpung mahta hpaji jawng hpe hpaw sharin ya ai re” nga nna Namhpaka Sinpraw buga muna kyithkai hpu-awn Sara Jadi Naw San tsun ai.
Ya aten hpaji jawng gawgap ai lam hta madung gaw ja gumhpraw yakhkak nga ai re majaw, ja gumhpraw garum ningtum jaw mayu ai ni nga wa yang, nawku hpung mahta hpaji jawng hpu-awn Rev. Zau Ring, phone-09966508873, Sara Jadi Naw San, Ph- 09268811521, 09694551 529 ndai phone hkringdat ni hta matut mahkai wa mai ai, buga hpung kaw nna mung hkap la nga ding yang re lam, Sara tsun ai.
Ndai CBE jawng hpe laiwa sai 2016 ning June shata praw 1 ya shani kaw nna tsang 4 du hkra hpaw sharin ai hta jawngma yawng marai 93 hte sharin sara/num ni yawng marai 9 rai nna, dai ning kaw nna tsang 5 bai hpaw jat na re lam chye lu ai.
