( 69 ) Lang na Jinghpaw Mungdaw Masat Ninghtoi lamang galaw
( 69 ) Lang na Jinghpaw Mungdaw Masat Ninghtoi masat shagrau akyu hpyi hpawng lamang hpe Amyu Sha Zinlum Hpung ni kaw nna woi awn ai hte Myitkyina, Shata Pru Manau Wang kaw 2017 ning January, 10 ya
jahpawt hkying 9:00am aten kawn shani hkying 12:00pm aten du hkra galaw ai lam chye lu ai.
Dai hpawng hta Jinghpaw Mungdaw Masat Ninghtoi byin wa ai labau kadun tsun sanglang dan ai lam, Htunghking ka hkrang ni, Majan byin nga ai kumla kamung naura ni madun nhtawm, KBC amu madu Rev. Dr. Hkalam Sam Sun kaw na “Mungdaw Ninghtoi kaw nna Kachin lawt lam de” ngu ai gabaw hpe mahta nna Mungga jaw ai hta “Wunpawng Amyu Bawsang ni Ga nbung ai gaw amyu nbung ai nre, Labau maumwi ginru ginsa yawng maren sha re, dai majaw Wunpawng amyu sha yawng kam hkat nna myit hkrum kahkyin gumdin na sha ahkyak dik re” nga nna tsun shadum mungga jaw ai hpe chye lu ai.
Wunpawng bawsang shagu na amyu sha ni, makam masham hpung woi ni, Kachin mung masa Party ni hte Kachin Cso ni, yawng marai ( 15,000 ) jan sa du shang lawm ai hpe chye lu ai.
Wunpawng Amyu sha ni yawng myit hkrum mangrum kahkyin gumdin nga ai ngu ai kumla hpe shapraw let manau wang kata grup hkra Amyu sha Dawnghkawn hpe sharawt ai lam, Myitkyina muklum kata na Wunpawng amyu sha dum nta shagu Amyu sha Dawnghkawn sharawt ai lam galaw ai hte ya na zawn masat ninghtoi akyu hpyi hpawng lamang hpe Hpakant, Mung Myit Sinli Ga ( Kachin Sub-State ) ginra kata hte Maigan mungdan shara law law hta mung galaw ai lam chye lu ai.
Jinghpaw Mungdaw masat ninghtoi lamang hpe Mungdan simsa lam sat lawat kaja wa ai hpang 2005 ning kaw nna 2011 ning du hkra Myitkyina, Shata Pru manau wang hta masat ninghtoi hpe shagrau sha a ai hku Manau poi kaba hpe galaw lai wa sai lam, dai hpang Myen hpyen dap ni kawn KIA hpyen dap hpe shagrawt majan hku gasat gala majan byin ai kaw nna dai zawn Jinghpaw Mungdaw Masat Ninghtoi lamang hpe wu wu di di galaw ai lam nnga ai hpe mung chye lu ai.
