Robert hpyen yen na Quarantine masha ni hpe asuya masat tawn ai shara kaw ntawn shangun ai majaw yak hkak hkrum nga
Miwa mung kaw bungli sa galaw nna du wa ai, Manmaw Ginwang Robert hpyen yen camp na mungmasha ni hpe Asuya ni masat tawn ai Quarantine shara hta nhkap la ai majaw myit tsang, yakhkak hkrum nga ai lam chye lu ai.
“Myit tsang ai lam gaw, anhte hkan byin wa ai rai yang kaga hkan byin ai hta grau hkrit ra ai, anhte hpyen yen kaw mung tawn da na shara nnga, dutdang yakhkak ai lam ni nga ai majaw, asuya ni masat da ai shara laika sharin jawng ni hta tawn na matu tsun yu ai raitim nhkap la ai mai byin yang, Asuya ni masat da ai shara kaw tawn da yang gaw grau hkrak na re. Mungkan ting masha ni yawng hkrit nga ai re majaw anhte mung grai hkrit nga ga ai” nga nna Robert Hpyen Yen Dabang Up Salang Ndau Tang Gun tsun ai.
Robert hpyen yen dabang na Quarantine masha marai 10 hpe ya aten hta Manmaw Ginwang KBC rung htap masum kaw tawn da ai rai nna, shat malu masha hpe gaw tinang a dum nta kaw na jaw sha nga ai lam chye lu ai.
Hkamja lam hpe gaw, asuya hkamja dap kaw nna hkum kahtet shadang shadawn ya ai lam, masum ya hta kalang sa gawan yu ai rai nna, nhtoi 21 ya quarantine galaw ngut ai hpang she tinang nta de bai wa shangun na re lam chye lu ai.
Manmaw Robert hpyen yen dabang hta nta htinggaw 620 daram, masha n-gun yawng marai 4000 daram nga ai rai nna, asuya hkamja dap kaw nna mung ningmu jahpaw hkaw tsun lam ni galaw nga ai lam, buga masha ni kawn chye lu ai.
