Hpakant lungseng maw kaw nhkun gyi nna masha si sum

Hpakant Aye Mya Ta Ya lawk, Tawng Pyu Bala Hka mare makau na lungseng nhkun langai kaw ga gyi ai majaw, ye mase tam masha marai 10 daram kaput lawm mat ai lam, buga masha ni kawn chye lu ai.

Lungseng nhkun gaw pe 100 jan tsaw ai re, Myanmar Thura, Unity, Paing Phyu Thiha lungseng company ni jahpawt hkying 4:00am aten kaw bungli hkring ai aten hta ye mase tam ai masha ni nhkun kata de lungseng shang tam nga yang, ga gyi wa nna masha marai 10 daram kaput lawm mat na masa nga ai lam, buga masha langai tsun dan ai.

Ga gyi ai shara hta company na Backho 2 hte amya tam ai shaloi, Mawmau Layang mare kaw nga ai Myen amyusha la langai hte mying n chye ai la langai hpe mu shaw da ai lam chye lu ai.

Hpakant lungseng maw ginra ni hta ya na zawn nhkun gyi, myeza bum gyi wa ai majaw, masha law law si, hkala hkrum nga ai re hpe mung chye lu ai.