Hkamja lam jep chyoi hkam la ngut sai marai 6 hpe bai wa shangun

Laiza, Mai Sak Pa hkamja lam jep chyoi dabang kaw na quarantine masha ni marai 6 hpe April shata 24 ya shani, tinang a buga dum nta de bai wa shangun sai lam chye lu ai.

“Daini wa ai ni gaw Hpun Lum Yang, Je Yang, Woi Chyai, Gangdau Yang hte Danai kaw na mungmasha ni re. Ya yang Mai Sak Pa hkamja lam jep chyoi dabang kaw quarantine hkam la ai masha marai 9 sha nga sai re” nga nna Mai Sak Pa Check Point Dabang Up Salang Kaba Seng Li tsun ai.

April shata 19 hte 20 ya shani hta mung, quarantine hkam la ngut sai marai 5 hpe wa shangun sai rai nna, nhtoi 14 ya tup hkamja lam jep chyoi hkam ngut ai masha ni hpe gaw, hkamja lam jep chyoi dabang kawn tara shang hkamja lam madi shadaw laika jaw nna wa shangun ai re.

Wunpawng Mungdan Shanglawt Hpyen Dap (KIA) Dap Awn Daju, Du Daju Jum Gunhtang Gam Shawng hte KIO Ginjaw Komiti Salang ni mung, April shata 23 ya shani hta Mung Lai Hkyet hkamja lam jep chyoi dabang hte Mai Sak Pa hkamja lam jep chyoi dabang de, sa du gawan n- gun jaw ai lam galaw ai hpe chye lu ai.