Kachin Anti Drug D. Day lamang hpe tinang nga ai shara kaw akyu hpyi myit dum ai hku nna sha galaw
Wunpawng Amyusha ni a Ka-ni Nanghpam gasat shamyit majan sharawt ai April (25), Anti Drug D. Day masat ninghtoi lamang hpe Covid-19 ana zinli a majaw, masha law law hpawng chyawm ai lam n galaw ai raitim, kadai mung kadai tinang nga ai shara kaw ja ja myit dum akyu hpyi ai lam galaw nga na matu Wunpawng amyusha Pat Jasan Jum Hpajang Komiti ni ndau da ai re hpe chye lu ai.
“Lai wa sai shaning hkan gaw Kachin Anti Drug D. Day hpe April 25 ya shani hta mungshawa akyu hpyi ai lam ni, Ka-ni nanghpam hpe nra sharawng ai ninghkap ai lamang ni shaning shagu galaw ai raitim, daining gaw Covid-19 kap bra ana a majaw, Steering komiti kaw nna ndau da ai hte maren ginra shagu nawku hpung shagu yawng hkan galaw nga na re ngu myit mada ai re” nga nna Wunpawng Amyusha Ka-ni Nanghpam Pat Jasan Masing Research and Documentation Working Group (RDG) Hpu-awn Sara Nhkum Tang Gun tsun ai.
Ya aten masha hpawng chyawm ai lam nmai galaw ai re majaw, Anti Drug D. Day masat nhtoi hte seng nna ndau laika hta ka da ai hte maren, tinang a nawku hpung dum nta kaw akyu hpyi ai lam galaw ai re lam, Danai Ka-ni Nanghpam Pat Jasan jum hpajang komiti malawm, Sara Nhpang Naw Tawng tsun ai.
Hpakant Ginra hta gaw, D. Day masat masat nhtoi hku nna, Pat Jasan palawng 1000 mi galaw nhtawm, buga pawng hpawm Pat Jasan ni hpe garan ya ai lam galaw ai lam, ndau laika na kyu hpyi na lam hte seng nna nawku hpung ni hpe akyu hpyi na lam shana da ai re hpe chye lu ai.
Steering Komiti kawn woi awn nna, Ginra Pat Jasan Komiti ni yawng hpe April 25 D.Day masat nhtoi shani hta kadai mung kadai tinang du nga ai shara kaw myit dum akyu hpyi nga na matu ndau shana da ai re.
Laiza ginra hte kaga buga ginra ni hta mung, Anti Drug D. Day masat nhtoi hpe tinang a dum nta kaw jahpawt hkying 7:00am hte 8:00am lapran myit dum akyu hpyi ai lam ni galaw nga ai re hpe chye lu ai.
Kachin Anti Drug D. Day hpe lai wa sai 2014 ning April shata 25 ya shani masat hpang ai rai nna, dai ning 2020 ning rai yang 6 ning hpring sai re.
