Covid-19 Ana Zinli Makawp Ninghkap Komiti ni kawn ndau shana laika shapraw
Ginjaw Covid-19 Ana Zinli Makawp Ninghkap Komiti ni kaw nna, April shata 26 ya shani hta ndau shana laika shapraw ai lam mu chye lu ai.
Dai ndau shabra laika hta 2020 ning April shata 24 ya shana, Jinghpaw Mungdaw, Monyin mare kaba hte Sam Mung Dingdung daw, Muse mare kaba ni hta Covid-19 ana kap hkrum ai masha ni hpe mu sai re majaw, tinang uphkang ginra kata de Covid-19 ana kap bra ai lam nbyin pru hkra seng ang ai Covid-19 ana zinli ninghkap komiti ni hte mungchying mungshawa yawng ndai ana zinli hpe grak lagra makawp ninghkap sa wa na matu tsun da ai.
Bai nna tinang uphkang gaiwang, ginjaw ginra kata hta galaw, htaw shalai nga ai Langu, Ginshau hpaga galaw ai hpaga bungli ni hpe mung, 2020 ning April shata 27 ya shani kaw nna, htaw shalai dut hpaga galaw ai lam hpe tsep kawp pat hkum kau sana re lam mung lawm ai.
Mai Sak Pa Check-point a shinggan de na du shang wa ai kadai mung hkamja lam maram masam ai (Quarantine) hkamla ra na lam, ndau laika hta tsun da ai kaw na chye lu ai.
