Roi rip sat hkrum ai saranum yan a ( 2 ) ning ladu hkrum myit dum akyu hpyi hpawng galaw
Mungmau Ginwang, Namtau Buga, Kawnghka mare hta laiwa sai 2015 ning January 19 ya shana mazut roi rip zingri sat kau hkrum ai KBC Laika Sasana saranum maran Lu Ra hte Tangbau Hkawn Nan Tsin yan a lahkawng ning hpring myit dum akyu hpyi hpawng hpe dai ni January 19 ya shani
hkying 11:00am- hkying 1:00pm aten e Kawnghka mare hta galaw ai lam chye lu ai.
Myit dum akyu hpyi hpawng hta asak ap nawng mat sai saranum yan hpe hkungga jaw masat masa galaw ai lam, Saranum yan a moimang hpe Muse kawn Myitkyina du hkra htaw shalai wa ai lam hpe Rev. Lama Yaw tsun dan ai lam, Saranum yan a hpang jahtum na tara rung dung ai ( ေနာက္ဆုးံအမူ ) hte seng nna Tara Kasa Sara Brang Di tsun dan ai lam, Mungga hpe KBC Amu Madu Rev. Dr. Hkalam Sam Sun kaw nna htawn tsun ai lam na chye lu ai.
Saranum yan a amu manghkang hte seng nna, laiwa sai 2016 ning May shata hta Lashu Balik rung hta mahtai tam lu na matu KBC kaw nna mahtai sawk tam Komiti hte manghkang byin ai Kawnghka mare hta du nga ai Myen hpyen dap Hk.M.Y ( 503 ) hpyen hpung hpe woi awn ai Du Awng Hpyo Myint, Du Myint Twin hte hpyen ma Zay Yar ni hte hkrum ai lam nga ai raitim, KBC mahtai sawk tam Komiti ni kawn san mayu ai ga san ni hpe dingtawk san na ahkang njaw ai lam hpe mung na chye lu ai.
Ndai amu manghkang hpe tengman ai mahtai lu na matu, Northen Shan State Kachin Lawyer Group ni kaw nna, matut sagawn nga dingyang re lam na chye lu ai.
