IDPs Camp hte buga hpung htinggaw shagu hpe malu masha garum jaw na
Myitkyina, Jan Mai Buga Hkalup Hpung kaw nna Jan Mai buga nawku hpung kata nga ai IDPs Camp hte buga hpung htinggaw shagu hpe April shata 30 ya shani malu masha garum jaw na matu hkyen shajin nga ai lam na chye lu ai.
Buga hpung htinggaw 880 jan hpe htinggaw mi hta, n-gu bye 8, shakau hkyeng joi mi, gala shapre joi mi, shakau hpraw, chying hkrang sau, jum hte Mask ni hpe garum jaw na re lam chye lu ai.
“Nmyit mada ai a kajawng sha ana zinli byin wa ai majaw, buga hpung masha ni tam lu tam sha yak hkak nga ai ten hta, nta kaw sha nga let ndai lu sha hpe sha nna n gun atsam hpring hpring hte ana zinli hpe makawp maga lu na matu yaw shada ai re” nga nna Jan Mai Buga Hkalup Hpung Amu Madu Hpungtau Hkangda Gun Tawng Li tsun ai.
Mai Ja Yang buga hkalup hpung kaw nna mung April shata 27 ya shani hta Mai Ja Yang buga hpung htinggaw shagu hte shingnan hpung masha ni yawng hpe n-gu, sau hte jum ni garum jaw ai re lam, Mai Ja Yang Buga Hkalup Hpung Amu Madu Sara Jangma Htoi Nan tsun ai.
Buga hpung kaw nna ya na zawn hpung masha ni hpe tsawra myit madun let garum jaw ai lam gaw shawng nnan lang re, aten masa hta hkan nna yak hkak ai lam ni nga wa yang matut nna garum jaw na masing nga ai re hpe mung chye lu ai.
