Mawtsiza buga hpung htinggaw shagu hpe malu masha garum

Hpakant Ginwang Masat 6 Dap Dung ni hte Mawtsiza buga hkalup hpung kaw nna, April shata 29 ya shani Mawtsiza buga hkalup hpung htinggaw 155 hpe malu masha garum jaw ai lam na chye lu ai.

Htinggaw mi hpe n gu bye 8, gala shapre bye mi, shakau joi mi, jum, sau ni garum jaw ai rai nna, ana zinli a majaw shinggan nmai pru ai ten hta hpung masha ni yak hkak jam jau hkrum nga ai ni hpe nawku hpung kaw nna madi shadaw garum jaw ai re lam, Mawtsiza Buga Hkalup Hpung Amu Madu Hpungtau Wanghte Yaw Htung tsun ai.

Mawtsiza buga hpung kata hta ana byin hkrum hkra ai lam rai nnga shi ai raitim, nawku hpung hkamja dap kaw nna tsi mawan ni mai byin ai daram hkyen lajang da ai lam nga ai rai nna, nawku hpung kata ana makawp maga tsi gat ai lam ni galaw nga ai re hpe chye lu ai.

Myitkyina, Jan Mai Buga Hkalup Hpung kaw nna mung, Jan Mai buga hpung kata nga ai IDPs camp hte nawku hpung htinggaw shagu hpe April shata 30 ya shani malu masha garum jaw ai lam na chye lu ai.