Hkai Rem Hpaji Sharin Jawng hta mying hkap la nga sai

Wunpawng Mungdan Shanglawt Asuya Hkai Rem Magam Dap kaw nna hpaw sharin ai 2020-2021 ning hpaji ladaw, Laiza Alen Bum Hkai Rem hpaji sharin jawng hpe June shata praw 1 ya shani kaw nna hpaw sharin sa wa na re majaw, hkai rem hpaji sharin hkaja mayu ai ni yawng hpe mying jahpan hkap la nga sai re.

Hkai rem hpaji sharin hkaja na jawngma ni gaw hkai rem hpe myit lawm ai rai ra na, hkamja lam kaja ra na, jawng lung ladaw ten hpring lu jaw ai rai ra na, nanghpam lu sha njai lang ai rai ra na hte akyang lai len kaja ra na.

Hkai Rem Hpaji sharin jawng hta Ningpawt Ninghpang Hkai Rem Jawng hte Lahta Tsang Hkai Rem Jawng (Diploma) hpan 2 hku nna garan sharin ya ai.

Ningpawt ninghpang hkai rem jawng hta jawng lung ladaw laning mi rai nna, laika tsang 8 lahta, asak 18-35 ning lapran na num/la yawng hpe hkapla sharin ya ai. Lahta tsang hkai rem jawng (Diploma) hta gaw jawng lung ladaw 3 ning rai nna, tsang 10 awng lahta asak 17-35 ning lapran na num/la yawng hpe hkapla sharin ya ai re.

Jawngma langai laning mi hta jawng jarik Miwa gumhpraw Yuan-1500 bang ra na hte bu hpung palawng hpun nba hkum tsup la sa ra na re. Jawng lung na jawngma ni yawng May shata 25-31 laman Alen Bum Hkai Rem Jawng de du ra na re.

Hkai Rem Jawng hpaw sharin ai yaw shada lam hpe Hkai Rem Magam Dap Lithkam, Lahta tsang hkai rem jawng Up, Sara Kaba Kareng Brang Seng ya na zawn tsun ai.

“Anhte amyu ni gaw hkai rem magam bungli kaw sha n machyu yang gaw ngang grin ai sut masa rawt jat ai lam ngu gaw mai byin na nre, Mungkan Mungdan shagu hta mung hkai rem kaw npawt nhpang tawn nna gaw de ai hkrai re. Wunpawng amyusha ni mung hkai rem kaw mahta nna lam magup hta bawng ring rawt jat wa na matu yaw shada ai.

Ya na ramma ni gaw hkai rem kaw myit nlawm wa ai re majaw, tinang a lu ai sha ai bu ai hpun ai nga shara dum nta hta npawt nhpang ra ahkyak ai ngu ai lam hpe hkawn hkrang nna chye galaw wa na matu, hkai rem hpaji ninghkring ni hpe shalat lu na matu, Mungkan hte shing daw nna lam magup hta bawng ring rawt jat wa lu hkra galaw na matu yaw shada ai re” nga nna tsun ai.

Jawng hta hkai rem hte seng nna shirin ginhpan 10 hte kaga chye ging chye mai ginhpan yawng pawng 14 hpe sharin ya ai re. Hkai Rem Jawng hpe lai wa sai 1997 ning hta Mai Ja Yang kaw nnan hpaw hpang ai kaw nna, 2020 jawng yu ai du hkra rai yang, jawngma yawng marai 376 hpe shalat la lu sai lam chye lu ai.