Gat hpe shara garan nna dut hpang nga sai
Laiza Muklum kata si mai si maw nam law nam lap dut na matu masat da ai shara Zup Awng Simsa Gawdin Pa ntsa kaw May shata praw 6 ya shani kaw nna gat dut hpang nga sai re.
Laiza Muklum kata nga ai gat ni yawng hpe May shata praw 7 ya shani kaw nna gaw shani hkying 11:00am aten du hkra sha hpaw nna, shana maga gat pat na re lam, Laiza Muklum Municipal Du Salang Kaba Nhkum Lum Tu tsun ai.
Si mai si maw dut na matu masat da ai gat shara kaw gaw aten masat da ai lam nnga ai rai nna, gat dut shara nlu ai ni hte gat kaba pat ai hpang dut mayu ai ni sa mai dut ai re. Masha lai hkawm ai ntsa kaw sa dut sha chyat ai lam galaw ai sha, masat da ai shara kaw shani shagu dut mai ai re lam, Salang Kaba matut tsun ai.
Ndai masing gaw Wunpawng Mungdan Shanglawt Asuya kaw nna Covid-19 ana zinli tinang KIO uphkang ginra de ndu npru, nkap bra lu na matu tau nau makawp maga ai hku nna galaw ai bungli masing re.
Ginjaw Covid-19 Ana Zinli Makawp Ninghkap Komiti kaw nna Laiza Muklum kata masha hpawng chyawm ai lam hpe mai byin ai daram shayawm kau lu na matu, shani shagu masha hpawng chyawm nna mari lu mari sha nga ai gat shara hpe bai garan nna dut shangun ai re lam chye lu ai.
Covid-19 Ana Zinli Makawp Ninghkap Komiti kaw nna mungshawa ni ana zinli nkap bra na matu galaw ai bungli masing re majaw, jahkring mi na aten laman hta yak hkak ai lam nga ai raitim, yawng a matu tinang nan mung shakut ra ai ngu ai myit hte yawng hkan shatup let, gat hpe sit dut ra ai aten laman hta naw shakut sharang na lam, Salang Kaba kaw nna tsun lajin da ai re.
