Nbung laru a majaw Woi Chyai hpyen yen hpaji jawng hte dum nta ni htenza hkrum

Covid-19 ana zinli a majaw tam lu tam sha yak hkak hkrum nga ai aten May shata praw 6 ya shana hkying 7:30am aten daram hta nbung laru du shang wa nna, Woi Chyai hpyen yen lawu tsang jawng, dum nta hte gat seng ni htenza hkrum mat ai majaw, hpyen yen mungshawa ni yak hkak hkrum nga ai re.

Nbung laru a majaw Woi Chyai hpyen yen lawu tsang jawng hte dabang kata lawk hkan na dum nta nkau htenza hkrum mat ai lam hte seng nna Woi Chyai hpyen yen Dabang Up Salang Kaba Nhku Naw Ja ya na zawn tsun ai.

“Woi Chyai hpyen yen lawu tsang jawng ram ram htenza mat ai, hpyen yen dabang kata hta gaw lawk 1 kaw 15, lawk 2 kaw 34, lawk 3 kaw 22, lawk 4 kaw 6 hten za mat ai re. Ndai dum nta ni gaw 2013 ning hta galaw da ai nta ni re” nga nna tsun ai.

May shata praw 7 ya shani gaw, htenza hkrum mat ai dum nta jahpan ni hpe hta gahkyin la nna Ginjaw hpyen yen lakawn lanawn rung de tang madun sa wa na re lam, htenza hkrum ai nta madu ni mung kaga shara de gan shanu shingbyi na matu yak hkak ai re majaw, htingbu nta hkan mai byin ai hku naw shanu nga ai re.

Dum nta ni hpe lawan nlu gram ai rai yang dabang gawknu de htawt sit nna gan shanu ra na masa nga ai re hte dai dum nta ni gaw shat gawk hte matut ai re majaw shat shadu sha na matu mung yak hkak hkrum nga ai lam, Salang Kaba matut tsun ai.

“Dum nta htenza mat ai majaw, nta kaw nmai yup mat nna htingbu nta de sa yup ra mat ai re” nga nna Woi Chyai hpyen yen Lawk 2 na Hpawmi Gummaw Ting Myaw tsun ai.

“Lai wa sai 2019 shaning kaw nna htenza nga sai shat gawk hpe Matter garum ningtum hpung ni kaw nna shadaw ni galaw ya ai, hpyen yen nnan yen wa ai aten hta shawa hku nna shadu sha ai shat gawk re, nbung a majaw hpri hpraw ni poi mat wa nna, shat shadu sha shara mayak nga ai re” nga nna Hpawmi Maran Doi Ling tsun ai.

Woi Chyai hpyen yen camp kata hta mare kahtawng 102 kaw na hpyen yen mungshawa htinggaw 1237 daram shanu nga ai lam chye lu ai.