Covid-19 ana makawp maga lam hte seng nna wunkat jaw
Sinpraw Ginwang Ginjaw Covid-19 Ana Zinli Makawp Ninghkap Komiti kaw nna Sinpraw Ginwang kata na, buga hkamja komiti ni, apnawng ramma ni hte magam gun Sara Wun, Saranum ni hpe May shata 15 ya shani Mai Ja Yang Pa Kahtawng Hpyen yen Dabang zuphpawng Gawknu kaw Covid-19 ana makawp maga lam hte seng nna wunkat jaw ai lam chye lu ai
Ginjaw Covid-19 Ana Zinli Makawp Ninghkap Komiti a matsun kata kaw tau nau shajin ai magam bungli ni hpe galaw gun hpai ai hte maren, Sinpraw Ginwang Ginjaw Covid-19 Ana Zinli Makawp Ninghkap Komiti kaw nna tatut galaw ai magam bungli langai re.
“Covid-19 ana makawp maga lam hta, magam gun ni chye ging chye mai ai magam bungli ni hte seng hpe shara 3 hpan 3 hku nna galaw nga ai. Mare buga hkamja komiti ni nchye nmai re ai lam ni hpe Pa Kahtawng zuphpawng Gawknu kaw masha marai 52 hpe lani mi wunkat jaw ai.
Sara Wun, Saranum marai 28 hpe shnhte galaw sa ra ai magam bungli chye ging chye mai ai lam ni hpe Mai Ja Yang Hotel zuphpawng gawknu kaw 2 ya sharin achyin ya na re hte apnawng ramma ni marai 40 hpe gaw Manau wang gawknu kaw 2 ya tup wunkat jaw na re” nga nna Sinpraw Ginwang Ginjaw Covid-19 Ana Zinli Makawp Ninghkap Komiti Amu Madu Du Kaba Marip Brang Awng tsun ai.
Sinpraw Ginwang Ginjaw Mai Ja Yang Quarantine dabang kaw hkamja lam jep chyoi hkam la ai masha marai 88 nga ai hta na, Quarantine hkamla ngut sai masha yawng marai 50 hpe wa shangun sai rai nna, ya ten Quarantine hkam la nga ai masha yawng marai 38 naw nga ai re lam, Sinpraw Ginwang Ginjaw Covid-19 Ana Zinli Makawp Ninghkap Komiti kaw na chye lu ai.
