Namti Kasung Hpyen yen mungshawa ni malu masha yak hkak hkrum nga

Covid-19 ana zinli a majaw, Namti mare kaw shanu shingbyi nga ai Kasung hpyen yen mungshawa ni tam lu tam sha yak hkrak hkrum nna, ya aten camp kata malu masha hkyak hkyak ra kadawn nga ai lam na chye lu ai.

Namti, Kasung Hpyen yen mungshawa ni malu masha ra ahkyak nga ai lam hte seng nna, Kasung Hpyen Yen Camp Lithkam Rev. Maran Yaw Htung ya na zawn tsun ai.

“Covid-19 ana zinli a majaw, ya aten gara de mung nmai pru bungli mung nlu mat ai majaw gara de tam sha na mung nmai mat ai sha n-ga, garum gahtau gara wuhpung ni mung ndu mat ai re majaw, shat shadu sha na n-gu ni kawn hkawt hkoi sha ra mat ai madang du taw ai re” nga nna tsun ai.

Kasung hpyen yen camp hta February shata kawn garum ningtum hpung ni ndu mat sai rai nna, ya aten camp kata hpyen yen htinggaw 111 shanu shingbyi nga ai re hte ndai Kasung hpyen yen ni gaw laiwa sai 2018 ning April shata kaw nna Namti de hpyen koi yen htawt wa ai re lam, Kasung Hpyen Yen Camp Lithkam matut tsun ai kaw na chye lu ai.

Photo Crd; KN