Man Mau mare na Salang yan hpe Muse Balik Dap kaw naw rim zing da
May shata 17 ya shana rim woi mat ai Man Mau mare kaw na Salang Marip La Tawng hte Salang Hpauyam Hka Li yan hpe Muse Balik Dap kaw naw rim zing da ai lam na chye lu ai.
Man Mau mare kaw na Salang ni gaw shan lahkawng na hpun nre ngu ai hpe sakse sa hkam shaw la na matu sa tsun ai raitim, bai dat ya ai lam nnga shi ai rai nna, nhtoi 15 ya hkyuk rawng ngut ai hpang she, amu jep chyoi na re lam, Man Mau mare na Salang langai tsun dan ai.
Salang Marip La Tawng a dum nta kaw tawn ai hpun madu Mungmyit Sinli Myo Ma Pyitu Sit kaw na U Tha Gyi hpe lu rim da sai rai nna, ndai hpun madu wa gaw shi na hpun re ngu hkam la ai rai yang, Salang yan lawt wa na masa nga ai re hte nhkam la ai rai yang Salang yan lahkawng hkyuk kaw shaning na na naw rawng ra na masa nga ai re lam, Salang wa matut tsun ai kaw na chye lu ai.
Lashu Myen Hpyen Dap, Dap Nu (99) kaw na hpyen n-gun 40 jan gaw May shata 17 ya shana Muse, Man Mau mare kata na dum nta hkan jut shagu sawk tam ai lam galaw ai hta Salang Marip La Tawng hte Salang Hpauyam Hka Li yan a dum nta kaw hpun lauban ni hpun wa tawn da ai majaw, dai nta madu Salang lahkawng hpe rim woi mat ai re hpe chye lu ai.
