COVID-19 ana kap hkrum ai machyi masha ni hpe tsi gawn lajang dabang hpaw lamang galaw
KIO Uphkang ginra hta COVID-19 ana zinli kap hkrum ai masha nga wa yang machyi masha ni hpe tsi gawn lajang na matu Mung Lai Hkyet, Masat 2 Quarantine Dabang kaw gawgap da lu sai hkring hkra tsi gawn lajang dabang (ICU) dingshawn lamang hpe May shata 25 ya jahpawt hkying 8:00am aten hta galaw la lu sai re.
N-dai dabang dum nta hpe hpri ni hte atsawm kum pat n-htawm tsi tsi hkamla ai ni hte tsi gawn lajang ya na ni a matu nga shara ni hpe atsawm masat da ai lam hte htap htuk shim lum lam lu hkra gawgap da sai lam, Ginjaw COVID-19 Ana Zinli Makawp Ninghkap Komiti Amu Madu Du Kaba Lahpai Hing Wawm tsun ai.
Machyi masha ni hpe makawp maga tsi gawn lajang na dabang (ICU) dum nta hpe lai wa sai April shata praw 8 ya shani kaw nna gawgap hpang wa ai hta May shata 20 ya shani ngut kre sai re hte shara hpe machyi masha marai 120 daram tsi tsi hkam la lu na matu hkyen shajin da ai sha n-ga, tsi ni arung arai ni hpe mung hkyen lajang da sai re lam, Du Kaba Lahpai Hing Wawm matut tsun ai.
COVID-19 Ana Zinli Tatut Woi Awn Komiti ni kaw nna mung, apnawng na ramma ni hpe saw shaga let machyi masha ni hpe tsi gawn lajang na lam, hpaji jaw ai lam, bungli shang ai ten tinang hkum hpe gara hku sadi ra ai lam ni hpe wunkut 4 ya hpaw sharin let apnawng ramma marai 10 hpe mung hkyen lajang da sai re.
Hpaw hpawng lamang hta KIO Ginjaw COVID-19 Ana Zinli Makawp Ninghkap Komiti Ningbaw Sara Kaba Sumlut Gam, KIC Amu Madu Du Kaba Lahpai Zau Raw, Ginjaw COVID-19 Ana Zinli Makawp Ninghkap Komiti Salang ni, Makam Masham Hpung Woi Sara ni hte Magam Dap de na myit su Salang ni sa du shang lawm ai lam chye lu ai.
