Chihpwi Hpyen yen dabang kaw hka hpyen hkrum katut nga

Chihpwi Hpyen yen dabang kaw May shata 26 ya shana hkying 7:00pm aten daram hta marang htu sawng nna, Nmai Hka kaba wa ai majaw mungshawa ni shim lum ai shara de htawt sit ra mat ai lam buga masha ni shana wa ai kaw na chye lu ai.

Hpyen yen dabang gaw lamu ga loi nyem ai shara re majaw Hka du shang wa ai re, Hka kaba wa ai majaw arung arai ni zing nna shim lum ai shara Nawku jawng de gan htawt sit shanu nga ra mat ai lam, Sara Yaw Na tsun ai hta, “Hpyen yen mungshawa ni a dum nta gaw kaji mi grau nyem ai shara kaw galaw da ai rai nga, du sat ni, Wa lawng ni, Rai ni gaw zing nna htawt sit ai lam dai ni galaw ai re, Wa lawng ni sha hten ai nta ni hten ai lam gaw nnga ai re” nga nna tsun ai.

May shata 27 ya shani hta Hka loi li yawm wa ai raitim, marang matut manoi htu nna hka kaba hka lim wa ai rai yang, nga shara ni yak hkak hkrum wa mai ai lam maram da ma ai re.

Mungshawa ni hpyen hprawng koi yen nna lam shagu hta yak hkak dut dang nga ai aten mungkan ting Covid-19 ana zinli bai byin wa ai majaw mung shawa ni tam lu tam sha yak hkak nga ai ten hta, ndai zawn Hka hpyen bai hkrum katut wa ai majaw lam shagu hta grai myit tsang nga ma ai lam, ya aten Chihpwi hpyen yen dabang kaw mungshawa htinggaw 165 daram shanu shingbyi nga ai lam chye lu ai.