Hpun Lum Yang Hpyen Yen Dabang kata Wa ana zinli hkoi tsai wa sai

Hpun Lum Yang hpyen yen dabang kata laiwa sai April shata kaw nna Wa ana zinli numdaw mi bai byin hpang wa ai hta, ya aten loi li hkoi tsai wa sai lam Hpun Lum Yang Dabang Komiti ni kaw na chye lu ai.

“Dabang kata Wa ana zinli a majaw hpyen yen mungshawa ni a Wa 41 si sum mat sai re, lai wa sai ten na Wa ana gaw kan mase kan chyat ai lam sha byin ai kaga kumla nmu ai, ndai lang na Wa ana gaw lak lai ai lam nga ai, si mat ai Wa nkau gaw ladi hku na sai pru ai re” nga nna Hpun Lum Yang hpyen yen ningtau dabang up Salang Nhkum Tu Lum tsun ai.

Wa ana zinli a majaw si sum mat ai Wa ni law malawng nga sai re majaw, ngam nga ai wa ni hpe ana zinli nbyin hkra makawp maga ai lam hte seng nna Salang wa matut tsun ai.

“Wa ana nbyin hkra wa lawng san seng san pan lam galaw shangun ai, nam htun gat ai lam ni galaw ai, ana makawp maga tsi ni htu ya ai lam, tinang dingdi ai ladat ni hte makawp maga lam galaw nga ai re”nga nna tsun ai.

Wa ana zinli a majaw si sum mat ai Wa ni hpe htu lup kau ai lam ni galaw ai re, dabang kata gat lawk hkan Wa shan dut shangun ai lam ni hpe hkum pat da sai rai nna, kaga shinggan de na Wa ni hpe mari bang ai lam hpe hkum pat da ai re lam chye lu ai.

Hpun Lum Yang hpyen yen dabang kata hpyen yen mungshawa ni gaw hkai lu hkai sha, Wa rem ai magam bungli hpe htinggaw 200 daram galaw ai rai nna, daining laman hta Wa ana zinli numdaw lahkawng lang byin hkrum sai re hpe mung chye lu ai.

Ya aten Hpun Lum Yang hpyen yen dabang kaw mare kahtawng 77 kaw na hpyen yen htinggaw 711 shanu shingbyi nga ai re.